Mindat peng hriamngan ruangah a thimi nu i a fale bawmhnak an herh
The Chinland Post | 2022 June 21 – Chin ramkulh, Mindat peng khuate lei cu SAC nih a luancia June 16 zinglei sml 9:00am hrawngah SAC ralkap nih hriamngan in an kah ruangah a thimi nu pakhat i a fale pawl bawmhnak an herh tiah theih a si.
Mindat khuachung ah hmun a khuarmi SAC battalion 274 nih 120 MM in kah ruangah mipi 3 an thi i cu chungah kum 30 nu pakhat nih a tantakmi a fale caah bawmhnak an herh tiah theih a si.
SAC ralkap nih kah ruangah lorian a ṭuan liomi kum 70 hrawng tarpa pakhat, kum 60 hrawng tarnu pakhat le kum 30 hrawng nu pakhat a hmunhma ah an thi colh.
“A thimi chungin kum 30 hrawng nu pakhat nih fa 3 a tantak hna. Upa bik hi nu a si i a tang ah pa 2 an um. Zeihmanh ṭha tein a thei rih lomi lawngte an si caah an chungkhat pawl nih an zohkhenh chung hna. An caah a herhmi bawmhnak zong kan hal lio a si” tiah khuami hna nih Mizzima ah an chim.
Ralzaam pawl an umnak khuate 1 ah hriamngan 3 a tla i mipi inn 4 a rawh lengah pa 1 hliamhma a tuar.
Mindat khuachung a ummi hna nih himnak a um lo caah khuate lei ah a zaammi le nelrawn lei a zaammi an um tiah theih a si.
About The Author
