Mindat Thongtla Hna Nih Rawlulh In Duhlonak An Langhter

Hakha-TCP |2018 December 2| Chin ramkulh Mindat pengkomh palek zung nih thongtla pawl zulh ding phunglam fak deuh in nawl an chuah caah November 29 thawk in thongtla pawl nih rawlulh in duh lonak an langhter tiah kan theih.

Thongtla pawl a va zohtu pakhat nih, “thongtla pawl ka hal tik hna ah a biapi bik cu i thianhlimhnak kong zong aa tel. Hlan bantuk in thonginn ah mah le ti te din khawh a si ti lo. Zapi fonh in din a si caah zawtnak a um le um lo zong kan thinphang. Haa tawl caan a phanh caan ah minung pakhat nih Haa tawlnak pakhat cio a kan pek. Ha tawlnak zong aho ngeih mi dah a si ti a fiang lo. Khuasik caan a si bantuk in puan lum zong an herh, cun mileng ton caan zong a tlawm” tiah a chim.

Thongtla mi pawl zulhding phung cu a langhnak hmun ah tarpiak hna seh law thongtla pawl nih zulh awk a si ko nain cu bantuk in tuah le taar a um lo, anmah hmurka lawng in nawlpek a si caah thongtla pawl caah sia a rem lo tiah a chim a chap.

“Thongtla pawl nih felfai tein zulhding phunglam fiangte taar in zapi hmuhnak ah an taar ah cun nawlngai tein zulh an duh ko, tu cu zeihmanh an taar ti lo. Cun thongtla pawl sin eidin pawl pek tikah thongtla sin a phak lo caan hna a um” tiah a chim.

Thongtla pawl nih thonginn ah duhlonak an langhter mi kong he pehtlai in Mindat pengkomh palek zung, Mindat peng palek zung hna ah phone in kan chawnh hna nain an tlai lo.

Khuacaan aa thlen ruang ah Mindat pelek zung i thong a tlami hna cu tlangrai in an zaw tiah theih a si.

Tu lio Mindat palek zung ah baiceih lio mi thongtla minung 12 an um i mileng ton caan hi zinglei suimilam 9 in 10 zaanlei suimilam 2 in 4 kar hi a si. Cozah zung khar caan ah cun ton khawh a si lo tiah kan theih. ++
Ref: Chin World

Na ruahning rak langhter ve.. (Leave a comment)

%d bloggers like this: