Miss Regina Noi Le The Chinland Post Biaruahnak

0

The Chinland Post| 2019 February 4| Kalay Sianghleirun ah sianginn a kai cuahmahmi Miss Regina Noi cu International level tiang Myanmar ram aiawh in miss a va i zuam kho. Miss aa zuamnak kong he pehtlai in The Chinland Post nih a tanglei bantuk in ton biaruahnak kan ngeih.

TCP: Nangmah le na Chungkhar kong a tawinak tein na kan chim kho hnga maw?
Noi: Regina Noi ka si. Ka nu le pa cu, Pi Lal Than Zaui le Pu Lal Hma Chhuana. Chungkhar unau 6 kan si. BA English Kumthumnak Kalay University ah a kai liomi ka si. Sanmyo (Satawm) sang Kalay ah 1999 April 28 ah ka chuak.

TCP: Zeitindah zungmawi (Art) lamthluan ah na luh ning le International level tiang na phak khawhnak hngalh kan duh ko?
Noi: Miss Myanmar Beauty Paradise Chin State thimnak Kalay ah Winner ka si i cu hnu cun Chin miphun aiawh in Yangon ah kaa zuam. Yangon ah rampi aiawh thimnak an tuah than i Miss Teen Glam International 2019 ti a si. Cu ahcun Winner ka si than i Myanmar rampi aiawh in Philippines ah ka kal. Miss Spokes Model le Best Swimwear timi Title laksawng pahnih ka hmu.

TCP: A dangdang ah Miss na hmuhnak tibantuk pawl a um maw?
Noi: A um lem lo hei ti ko usi.

TCP: Chin miphun na si ruangah rampi huap zuamnak na luh tikah na tonmi harnak (Challenges) a um maw?
Noi: Yangon i kan i zuam ah khan Chin ramkulh in 5 kan kal. Kan lung aa rual. Miphun dang pawl nih an kan zoh thla. Ca zong an kan cawnter lio ah Chin aiawh in a kalmi kha ca lei zong ah hmaisa kan si tikah kan i nuam. Tlangtlatu leikap zong in tha an kan pek in an ka forhfial mi kan hmuh tikah kan i lawm. Zuamcawhnak ngaingai ka ngeihmi cu a um lo.

TCP: Hmailei ah tah pehzulh in hihi tuah naa tim maw?
Noi: Ka pawcawmnak rian tiang cun tuan dingah zungmawi lei hi kaa tim lem lo nain ka huammi pakhat a si caah ka si khawh tawk cu pehzulh in tuah kaa tim peng ko.

TCP: Na zuam phun?
Noi: Gym celh le cachimh ka huam.

TCP: Nu pakhat caah hin nuhrin muisam maw a biapi deuh hruk aih thiam dah a biapi deuh tiah na ruah?
Noi: A pahnih tein a biapi ko. Kan nuhrin muisam siseh thil kan i hruk-aih mi ah siseh mah le mah le mah zumhngamhnak (Confidence) kan ngeih a biapi.

TCP: Pasal caah na duh phun? Miphun dang le biaknak he ithitumh tah zeitin na hmuh ning?
Noi: Pathian a tih i Khrihfa chungkhar a dirh khomi le keimah a ka hruai khotu ding pasal ka duh.

TCP: Tlangval pawl nih a lawng ti hnga maw an ti?
Noi: Ka nu le pa nih an ka hrin ning tein ka um rih ko hih!

TCP: Lai mino sinah biacah na duhmi?
Noi: Zei kan tuah hmanh ah ralthat le zumhngamhnak ngei tein thil tuah kho mi si ding i zuam hna usi. Cun kan zuammi le kan tuah dingmi thimthiam a biapi tuk. Cun zei kan tuah paoh ah toidornak he hmaipanh le hliphlau tak in thil a tuahmi si hna usi tiah biacah kan duh hna. Hi biatlang te hi keimah zong nih kaa tlaihmi a si. Hi biatlang i tlaih in keimah zong Philippines tiang kan ram aiawh in ka va kal tikah teinak cu ka hmu lo nain upa pawl nih mithmai tha pek in an ka dawt timi ka hmuh khawh.

TCP: Careltu dihlak sin biacah na duhmi?
Noi: Hi bantuk dirhmun sunglawi hi ka phan kho te lai tiah ka thinlung zong in ka ruat lomi dirhmun ka phak hi Bawipa zaangfahnak le a lamkip in a ka dirkamnhtu nanmah thawng in a si ti kaa fiang. Nan dihlak cungah kaa lawmtuk, Bawipa thluachuah nan cungah tlung ko seh!

TCP: Na caan pek in kan biahalnak tlamtling tein na kan leh caah kan i lawm.
Noi: Kei zong kaa lawm ve.

Hmaitonh Biaruahtu: Salai Ngun San Aung
A hmun: Kalay

About The Author

Na ruahning rak langhter ve.. (Leave a comment)

%d bloggers like this: