Myanmar Idol Top 7 Ah Ni Len Par Mawi Aa Tel; A Dongh Tiang In Kan Dirpi Rih Uh

City Hunter| 2018 June 29| Myanmar Idol season 3 zuamnak a thiam bik minung 7 (top 7) chung ah Lainu Ni Len Par Mawi aa tel rih. June 28 zan ah a thiam bikmi minung 8 hlazauamnak an ngei i June 29 zan ah result an thanh. Cu result thanhmi ah minung pakhat a tla i a thiam bikmi minung 7 lakah ah Lainu Ni Len Par Mawi aa tel hi a si.

Myanmar Idol hi Ooredoo company nih sponsor a pekmi a si caah Ooredoo Simcard aa tlaihmi nih duhzat paoh vote pek khawh a si. Zahan aa zuammi 8 chungah mizapi leikap in vote tlawmbik a hmumi 3 cu bottom down ah chiah an si, cu chiahmi pathum chung ah Ni Len Par Mawi aa tel. Asinain cu chung in minung pahnih kha mark (judges) petu nih an kaiter hna, cuti kaitermi ah Ni Len Par Mawi aa tel. Cu ruang ah top 7 chung ah Ni Len Par Mawi aa telnak hi a si. A dang pakhat cu Myanmar Idol in a tla lan cang.

Ni Len Par Mawi hringtu a pa Pu Hrang Vung nih, “Ramchung ramleng Chinmi zapi nih thlacamnak in siseh, vote peknak in siseh tha nan peknak thawng in nihin tiang kan fanu Ni Len Par Mawi cu top 7 tiang a phan kho cang. Hlasak hi cu an thiam ciocio ko hna, mizapi vote peknak hi teinak hmuhnak ding ah a biapi tuk hringhran. Chinmi nih vote nan pek cio nakthawng in Myanmar ram pumpi hla zuamnak Myanmar Idol winner tiang nan phakter khawh. Cucaah, Myanmar Idol ah Chinmi nih winner kan hmuh khawh nakhnga a dongh tiang thlacamnak in siseh, ooredoo vote peknak in siseh a dongh tiang thazaang nan kan chuahpi in nan kan tanpi rih naklai bawmhchanh kan herh ko” tiah The Chinland Post ah a chim.

Tukum Myanmar Idol winner laksawng cu ks. 50 million (sing 500) pek pin ah album chuahpiak a si lai. 2016 kum (season-1) ah Myanmar Idol cotu cu Saw lah Htaw Wah a si. 2017 kum season-2 ah Thar Nge a si.

Myanmar Idol zuamnak cu Cawn ni li zan lengmang tuah a si i Live in zuamnak an dih le cangka zan suimilam 11:00 in a thaizing cawn ninga zanlei suimilam 6:00 tiang mizapi nih vote pek khawh a si.

Mizapi nih thazaang kan pekmi hna vote ning cu Myanmar Idol application kha download tuah in vote khawh a si. Download kan tuahmi application pakhat in minung pathum tiang vote khawh a si.

Iphone a hmangmi caah  https://itunes.apple.com/us/app/mntv-myanmar-idol/id1400046900?mt=8

Android phone hmangmi caah  https://play.google.com/store/apps/details?id=com.myanmaridol.android&hl=en

Cun Ooredoo SIM Card in vote khawh a si. Oredoo SIM Card a hmangmi nih 7777 ah khan voting number na duhmi te khan a tial lai i na kuat lai. SIM Card pakhat in an duh zat paoh vote khawh a si. Ooredoo simcard hmang in Nilen Par Mawi vote pek na duh ahcun 7777 ah 3 tiah na tialpiak lai. Number 3 hi Nilen Par Mawi vote number a si.

Ni Len Par Mawi a tapa zong hi Nicolas Dawt Kam Sang zong Eain Meet Soneya Season-9 hlasak zuamnak ah pahnihnak a rak hmu balmi a si.

Ngaknu Nilen Par Mawi cu Engineering of Electronic Communication (EC) in Yangon ah sianginn a dih mi a si i Make Me Beautiful timi tamhmoih lei zuamnak zongah Myanmar Ram Pumpi huap in aa zuam i a thiambik pathum thimmi tiang aa telmi a si.

Amah hi kum 23 a si i Senthang peng Dongva khuami Pu Hrang Vung le Pi Thluai Iang @Thote nih an ngeihmi fanu hniang bik a si.
Nilen Par Mawi hi Eain Mat Sone Ya ah top 3 i a rak i telmi Nicholas Dawt Kam Sang far nu a si. Hi bantuk in fim cawnnak lei zongah sii-inn zungmawi thiamnak lei in siseh hlasaknak lei zong in siseh bochanmi a si i miphun dang hna lakah Chin miphun mithmai a kan ngeihtertu ngaknu pakhat a si. +++

Na ruahning rak langhter ve.. (Leave a comment)

%d bloggers like this: