Na Tuh Bang Na Zuun Lai Muicawl Thlaknak Ah Chinram Palek Nih An Bawmh Hna Lo Caah Yangon Palek Bawmh An Hal
Salai CungCung|2019 June 13| Hakha ah muicawl an i thlak liomi “Na Tuh Bang Na Zuun Lai” timi muicawl thlaknak ah muicawl khankhat ca i thlak ding in palek an herh hna i Chin ramkulh Palek bawmh an hal hna nain an bawmh khawh hna lo caah Yangon lei palek bawmh an hal hna tiah kan theih.
“Hi muicawl kan i thlak hlan in Chin ramkulh palek sin le Chin ramkulh minister sin ah kan chimh cang hna. An mah hnatlaknak tein kan tuah mi a si. Hi muicawl thlaknak ah hin palek he aa pehtlai mi thlak ding kan ngeih caah Chin ramkulh palek bawmh kan hal hna. Nan mah producer pumpak in Naypidaw ah bawmh va hal hna u law a tha lai an ti. Cucaah Yangon lei um mi muicawl lei a bawmtu palek pawl kan mah producer he aa theihngalh mi kha bawmh an hal hna i cu ti cun an i thla” tiah Na Tuh Bang Na zuun Lai timi Scrip lei tuanvo latu Salai Lalawmpuia nih The Chinland Post ah a chim.
Hi muicawl thlaknak ah Chin ramkulh palek nih an bawmh khawh lo nak kong he pehtlai in Pa Pui nih, “muicawl kan i thlak hlan hrim in tha tein palek sin ah kan chimh cang hna. Hi muicawl ah cun palek lei zong tampi fim chimhnak ai tel ti in, cun Chin ramkulh cozah le minister pawl tha tein kan chim hna i a si khawh tawk in kan in bawmh hna lai a kan ti. Hi bawmh duh lonak kong hepehtlai in Minster Pau Lun Min Thang, Hluttaw Speaker Pu Zo Bawi le minister Han Win Aung kan chimh than hna tik ah an mah zong nih phone an chawnh hna i rak bawmh hna u tiin an chim ko hna nain a kan bawmh hlei lo. Hi tluk tiang Chin ramkulh cozah minister hna nih rak bawm hna ti an chimh ko mi hna nain a ngah lo. Naypidaw ah kan tin mi a si, a cung lei in nawl a kan pe lo, nanmah te in producer pumpak in Naypidaw ah va chim hna u a kan ti caah hnahnawk tiin kan producer te theihngalh Yangon lei Palek tu bawmh kan hal” tiah a chim.
Kawlram muicawl thlaknak kaa dang ah cun an mah le ramkulh, ramthen palek nih a herhnak zawn tete cu an bawmh cio hna tiah kan theih.
“Hmailei kan ram le kan miphun caah muicawl hi mino caah a herh ngai mi le a biapi ngai mi a si caah thazaang pek in bawmh awk a si. Chin ramkulh cozah lei zong biatak tein a kan bawmh a hau, tahchunhnak ah tu bantuk Chin ramkulh palek nih a kan bawmh khawh lo tikah Yangon lei hna cah ding hin cun a har ngai. Hi bantuk in khat lei khat lei donkhantu a um tikah Laimi thanchonak caah tampi harnak a um. Chin ramkulh zung kip le a dang dang hna zong nih hi bantuk pawl ram le miphun caah rian tuan mi an si ti in an bawmh hna awk a si ti ka ruah” Pa Pui nih a chim chap.
Na Tuh Bang Na Zuun Lai timi muicawl cu tu thla chung ah a dih cang lai. Hi muicawl cu edit le a dang dang an dih hnu ah tapephel VCD, DVD in chuah lo in Sky Net, DVB, MRTIV, YouTube , Online tibantuk a dang dang in an thlah lai tiah kan theih.
Photo: Theihtlei
About The Author
