Paletwa Peng, Ta-ron-ai Khua Cu SAC Nih Bom A Thlak, Nu 2 Telh In Minung 5 An Thi
The Chinland Post | 2024 May 22 — Chin ramkulh, Paletwa peng, Kaladan tiva kam ah a um mi Ta-ron-ai khua cu kahdohnak um lo pi in SAC nih bom a thlak caah nu 2 telh in khuami minung 5 an thi tiah theih a si.
May 21 zaanlei sml 4:00pm hrawng ah Ta-ron-ai khua cu Jet vanlawng in voi 3 tiang bom a thlak hi a si i nu 2 telh in minung 5 an thi i 11 an i hliam tiah theih a si.
“Nizaan ah minung an i butnak Ta-ron-ai khua dawr tlang ah a cang, A tanglei Balai khua in Khumi pa 2 telh in minung 5 an thi, Ta-ron-ai hi a cung le tang in a um. Bom a tlaknak hi Ta-ron-ai dawr tlang ah a si” tiah Khumi mino pakhat nih Khonumthung Burmese ah a chim.
Bom thlak ruang ah Ta-ron-ai khua in mipi inn pakhat le dawr pakhat a rawk i aa hliam mi 10 nak tlawm lo an um. An hliamhma a fak tiah theih a si.
Ta-ron-ai khua hi a hlan ah SAC ralkap nih fek tein hmunhma an khuarnak a si nain a luancia 2023 December 4 ah AA nih khua ning in a rak lak.
SAC ralkap pawl an thiannak hmunhma a si hnu ah khua he aa hlat tuk lonak ah AA nih sakhaan an bunh chung tiah theih a si.
Inn 100 leng khuasa an sinak Ta-ron-ai khua hi Khumi miphun le Rakhine miphun hna an umnak khua a si.
About The Author
