Paletwa Thonginn ah Nu Tlaihhrem Lio A Hmutu Palekpa Matupi Palek Sakhan ah Kuat

0

Salai Josephbawi| TCP-Hakha| 2020 December 2| Chin ramkulh Paletwa Sakhan thonginn ah Palek pakhat(kum 50 fai) nih thong atlami nu (kum 30) hrawng a tlaih hremlio a hmutu pakhat cu a ruang um lo in December 1, 2020 ah Matupi thonginn ah an kuat tiah thawngtheih a si.

“ Deilei 4:00 cun ka hngilh kho tawn lo. An thong ka theih cu ka va bih hna i atu tlaihhremtu pa cu a rak si. Cu a tlaihhrem kong cu Palek ka hawi le sin ka phuan tikah a tlaihhremmi nu chungkhar kanmah palekmi aa tel caah a thin a hang i kan buai len. Sakhan hmu zong nih a ka auh I a ka hal. Ka hmuh ning tein ka chim. A lenglei thawng a puan cu aho sin cu ka thei lo. Keimah kha December 1, 2020 ah Sami na kallai Matupi Palek sakhan ah naa thial lai tiah an ka ti, ka nupi le fale caah ka lungre a thei ngai” a ti tiin mithmuh kuttongh in a hmu tu biachimmi cu min langhter lo Paletwa inntek pakhat nih The Chinland Post ah a chim.

“ Zei ruangah a hmu tu taktak  Matupi palek sakhan lei an thial colh ti ka thei lo. Phungningin ithialnak ca zong kan hmu lo. A tlaihhremtu pa hi Rakhine a si caah pakhatkhat a sisual lai tiin an thial zong a si kho. Inntek nihcun thildik thuh an timh caah tiah an ruah cio ko” tiah min langhter duhlo Paletwa inntekmi nih The Chinland Post ah a chim.

“ kanmah Chin Women Organizaiton (Paletwa) nih hikong kan cawlcang ko. Fiang tein zeitin dah kan tawlrel lai ti kan chah rihlo nain upadi ningin kan tawlrelpiak hna seh ti kan duh bik ko” tiah Chin Women Organizaiton (paletwa) Secretary Pi Aung Mah Phyu nih The Chinland Post ah a chim.

“Tlaihhrem a tongmi hi thluak lei zawtnak le chambaunak a ngeimi a si. Fa (4) a ngei cangmi a si I Siibawipa nih thla (6) dan ah siichunh ding a ti nain humhimnak ruangah Paletwa kal a ngah lo ca le sii lak a ngahlo caah a zawtnak a puang I afa a thah caah Paletwa Myoma thonginn ah thong a tlak lio hi a si” tiah a biapeh ah a chim.

Tlaihhrem a tongmi hi Paletwa peng Ohphlang khuami a si I August (7) ah a fa kum (2)tluk a thah caah thong a tlak hi a si. Hi tlaihhremnak hi Paletwa sakhanhmu lei nih thil dik lo a si tiah an ti nain TCP lei nih Palek sin thongfiang kan hal kho rih lo.

Hi bantuk pumtlamtling lo tlaihhremnak hi November 17, 2020 Sami Ralzam dornak hmun ah kum (23) nu mitlei tlamtling lo cu kum (40) fai nih tlaihhremnak siseh, Hakha peng mitlei tlamtling lo nu (20)fai cu November 12, 2020 ah kum (50) pa nih siseh tlaihhrem an ton nain biaceihnak dik ngaingai an tuah piak rih hna lo tiah theih a si.

 

 

About The Author

Na ruahning rak langhter ve.. (Leave a comment)

%d bloggers like this: