Pu Ci Ling Kum 66, Umkheng A Tum Ti Ruangah Hakha Palek Nih An Tlaih

0

Hakha ah Ralkap Duhlonak Belkheng Tum/ TCP

TCP-Hakha| 2021 February 4| Hakha dawrthar sang ummi Pu Ci Ling, kum 66 cu an innhmai ah umkheng tum in ralkap uknak duhlonak a langhtermi pawl a zoh hna nak ah Hakha palek nih Feb 4 zan suimilam 8:00 fai ah an tlaih.

Pu Ci Ling fapa a hniang bik nih “Ka pa hi umkheng zong a tum lo. Inn hmai ah umkheng a tummi pawl a zoh hna lioah palek motor pahnih an ra i umkheng tummi mino pawl cu an zaam caah ka pa tu an tlaih. An tlaih le tlaih lo hmanh kan thei zau lo. Inn ah a chuah tilo tikah kan hawile sin in kan hlat i cun Palek sakhan kan chawnh tiangah zeihmanh an chim duh rih lo. A hnu ah midang palek theihhngalh a ngeimi tu nih an tlaih ko timi thawngfiang an kan thanh” tiah a chim.

An tlaih ti thawng an theih sin tein Hakha mino 21 nih sakhan ah zan suimilam 10:00 ah an va kal hnawh hna i zeiruangah dah nan tlaih timi an va hal hna. Palek Upadi pohmah 47 (Yee Act pohmah 47) mizapi hnahnawhnak chuahpi timi case in kan tlaihmi a si i thaizing ah biaceih zungah tangka 50 in rak tlanh te uh tiah palek lei nih an rak ti hna.

Hakha ah hin ralkap uknak duhlonak langhternak caah Feb 3 zan khan sangchung cheukhat ah umkheng tum nak cawlcanghnak cu an thawk i Feb 4 zan khan mino cheukhat hrihhawhnak in zan 8:00-8:30 kar Hakha khuapi chung dihlak mah le inn cio in umkheng tumnak cawlcanghnak cu biatak tein an tuah. Pu Ci Ling hi tutan ralkap uknak duhlonak langhternak he pehtlai in Laitlang chungah palek nih an tlaih hmasabik mi a si tiah kan theih.

Thantlang khuachung zongah hi bantuk cawlcanghnak cu an tuah i cheukhat cu Palek nih an inn ah kalhnawh in hrocer le biahal a tongmi zong an um tiah theih a si.

About The Author

Na ruahning rak langhter ve.. (Leave a comment)

%d bloggers like this: