Pu Ngun Kung Nih Rangcit Phawhhnih Tlik Ah Pakhatnak A Hmuh
Tawk Tling Thang| 2019 February 19| The Hakha Post tawlrelnak in February 19 zingka, Kio Mang certual, Hakha ah tuahmi rang cit phawhhih tlik zuamnak ah pakhatnak a hmuh i Kawl kal ah Pu Tawk Hmung nih pakhatnak a hmuh ve tiah kan theih.
Phawhhnih tlik zuamnak ah teinak a hmutu cu; pakhathnak ah Pu Ngun Kung (Hakhathar), pahnihnak ah Pu Tawk Bil (Khuathar) le pathumnak ah Pu Kep Hnin (Khuathar) nih an co.
Kawl kal zuamnak ah pakhatnak ah Pu Tawk Hmung (Khuathar), pahnihnak ah Pu Ngun Kung (Hakhathar) le pathumnak ah Pu Tawk Bil (Khuathar) nih a co.
Rang dawhnak zuamnak ah Pu Ca Kio rang (Dawrhlun) nih a co. Hi ni ah Phawhhnih he, Kawl kal he Pu Ngun Kung nih aa citmi hi Dawrhlun Pu Ca Kio rang a si. Rang dawh zuamnak ahcun amah Pu Ca Kio nih aa cit.
Laksawng cu a tanglei bantuk in Roca he an pek hna.
- Kawl Kal
- Pakhatnak : ks. 200,000
- Pahnihnak: ks. 100,000
- Pathumhnak: ks. 50,000
- Phawhhnih
- Pakhatnak : ks. 200,000
- Pahnihnak: ks. 100,000
- Pathumhnak: ks. 50,000
- Rang Dawhbikhi ks. 50,000 laksawng pek an si.
Phawhhnih aa zuammi zapi minung 7 le Kawl kal aa zuammi zapi minung 10 an si. Hi pin ah nu pathum rang aa cit vemi zong committee haotu Pu Thla Hre nih ks. 10,000 cio laksawng a pek hna. Rang cit zuamnak hmun ah rang chuahpimi zapi hi rang 15 an si nain rang 5 cu cit awk an tha lo nain committee nih laksawng an pek cio ve hna tiah kan theih.
Pu Ngun Kung hi kumdang rang cit zuamnak tuah a rak si lio zong ah laksawng a co pah theu.
Hika ah Rang citmi zuamnak an tuah lio video zoh khawh a si.
Hakha ah tuahmi Chin Miphun Ni ahhin a luancia kum ah an rak tuah lengmang nain atu hi an tuah ti lonak a sau pah cang. Tukum hi The Hakha Post nih a hmasa bik rang cit zuamnak an tuah than a si.
The Hakha Post nih chawva hrambunh in an tuahmi cung ah Chinram cozah nih ks. sing 10 (1,000,000) le a lenglei in upa cheukhat nih bawmhnak an pek cio hna tiah kan theih.
Hi rang cit zuamnak ah Chinram cozah in Social Affair minister Pu Pau Lun Min Thang le Chin ramkulh upadi bawizik Pu Sunny Thang Cung nih biatawi chimnak le forhfialnak zong an ngeih hna.
About The Author
