Queen Elizabeth II ruak humhnak cu Londan khua Westminster biakinn ah an tuah lai

The Chinland Post | 2022 September 12 – Britain Siangpahrang nu Queen Elizabeth II ruak humhnak cu London khua Westminster biakinn ah September 19 (Nikhat ni) ah an tuah lai tiah theih a si. September 11 ah Queen Elizabeth a ruak cu London ah an rak phorh i mual a liamnak Balmoral Castle in meng 170 leng aa hlatnak ah a ummi Scotland khuapi Edinburgh ah an phorh.

Sml 6 hrawng a raumi khual lam chungah Aberdeen Dundee le Perth khua hna an tan i mipi tampi zong nih upatnak an pek. Queen Elizabeth ruak cu Edinburgh khua Holyroondhouse ah an chiah lai i cuka hmun ahcun mipi nih upatnak an rak pek lai.

September 12 ah Queen Elizabeth a ruak cu St. Giles’ biakinn ah an kalpi i September 13 ahcun Queen Elizabeth i a fanu a simi Royal Princess Anne nih biakinn in Edinburgh vanlawng tual ah an thlah lai i cuka hmun in Royal vanlawng nih London khua Buckingham Palace ah an phorh lai. September 14 ah Buckingham Palace in Westminster ah The King’s Royal Cavalry nih an phorh lai i The Royal Family he raltuk cawnnak langhternak zong an tuah lai.

Cu hnuah Siangpahrang thar a rak kaimi King Charles le The Royal Family nih Canterbury Bishop Justin Welby he thlacamnak an tuah lai i mipi sin ah an langhter lai. Cu hnuah Sep 15 thok in Britain mipi hna nih a hnubik upat an pek khawhnak hnga ni 4 chung Westminster cu an awn lai i September 19 zinglei ah Rampi in ruakhumnak an tuah lai.

Siangpahrang nu ruahhumnak cu The Royal Family le Britain cozah nawlngeitu hna lengah vawlei cung ram hruaitu pawl le adang dang awiawhtu phu pawl an kai lai. Cu hnuah Siangpahrang nu a ruak cu Windsor Palace ah an kalpi lai i a vapa The Royal Prince Philip thlaan pawngah an vui lai tiah theih a si.

Na ruahning rak langhter ve.. (Leave a comment)

%d bloggers like this: