Rihkhawdar Le Tedim Karlak India Bawmhnak In Lam Thar An Cawh Lai
Salai Elvis| 2019 March 19| India-Myanmar pehtlaihnak le chawhleh thalnak lam a si mi Rihkhawdar-Tedim karlak motor lam pi cu India cozah bawmhnak in lam thar an cawh lai tiah kan theih.
“India cozah bawmhnak in hi motor lam cu a hramthok in a dongh tiang tuanvo lak in an cawh lai. Zohfelnak zong tuah dih a si cang, lam hlun kha rinh lo in lam thar in an cawh lai. Hi lam cawhnak dingah a hnursuan dingmi vawlei hmunngei mi hna zong an mah India lei nih liamhrulhnak an pek dih hna lai” tiah sipin vuanci U Soe Htet nih a chim.
Atu lio Rih-Tedim karlak motor lam pi cu chukcho a tam caah motor chuahluhnak kongah harnak tampi an rak ton caah lamthar in cawh an timh hi a si. A tu an hman lio mi lam nak in an cawh ding mi lam cu meng 20 leng a sau deuh lai tiah kan theih.
“Rih-Tedim karlak lam biatak tein an kan cawhpiak ah cun khualtlawng mi hna zong tihphannak a um ti lai lo, nuam te le zaangdam tein an kal kho cang lai. A si nain hi lam cawhnak ruangah dum le lo a ngei mi hna an um sual ah cun liamhrulhnak zong tha tein an pek hna awk a si” tiah Rihkhawdar khuabawi Pu Chanliana nih a chim.
Rihkhawdar le Tedim karlak motor lam cu meng 33 aa hlat i Kalay-Tedim-Rih lam cu India-Myanmar pehtlaihnak hmun No.2 a si bantuk in chawleh thalnak ah an hman bik nak hmun zong a si. Kalay-Tedim karlak lam cu a tha tuk ko nain Tedim-Rihkhawdar lam tu cu a bik in fur caan ah a chiat tuk caah khualtlawng mi pawl harnak tampi an tonnak hmun a si tiah kan theih.
Ref: Khonumthung
About The Author
