Rung Lian Ceu Nih Naga Paih Laksawng A Hmuhmi Zapi A Hlut Dih

Tawk Tling Thang| 2019 March 13| India ram, Nagaland State khualipi Kohima ah aa paimi Rung Lian Ceu nih paih in laksawng a hmuhmi Rs. 110000 (Kyats 2,200,000 tluk) cu a zapi te in midang sin ah a hlut dih.

March 7, India ram, Nagaland State khualipi Kohima ahtuahmi Open Wrestling paih ah Rung Lian Ceu nih pathumnak laksawng ah Rs. 100,000 (Kyats 2,000,000 tluk) le paih dawh bik laksawng Rs. 10,000 (Kyats 200,000 tluk) a hmuh.

aa paih lai te ah thla a camtak lio

Hi laksawng a hmuhmi zapi cu midang sin ah a hlut dih. CNF/A sin ah Rs. 60,000 (Kyats 1,200,000 tluk) Hakha lei in paih ah a rami phu sin ah Rs. 10,000 (Kyats 200,000), India ram New Delhi in a rak zultu minung pathum sin ah Rs. 10,000 cio a hlut. Cun, paih dawh bik laksawng a hmuhmi Rs. 10,000 cu a zapite in Hrang Tin Thang a thenh dih tiah tuanvo ngeitu upa sin in kan theih.

Rung Lian Ceu nih, “Tutan Naga paih ah champion ka co khawh lonak a ruang bik cu kan paih phunglam aa khah lo ruang ah a si. Asinain, champion ka co lo ruang ah ka ngaih a chia lo. Hitiang dirhmun Chinmi nih kan i paih khawhmi cung ah kaa lunghmuih tuk ko. A taktak le a ngaingai ti ahcun laksawng co le hmuh duh ruah ah kan rak i paihmi a si lo. Lai paih thanchoter le cawisan duh ruah ah kan i paihmi a si” tiah The Chinland Post ah a chim.

Pu Zo Tum Hmung nih, “ Rung Lian Ceu cu CYO Chin Person of the Year 2019 Pek Phu TakTak A Si. Nagaland aa Paihmi Laksawng a hmuhmi chungin Rs. 60,000 cu CNF ah a pek. Miphun le ram dawtnak thinlung a ngeihnak (patriotism) a langhter. Hi bantuk lungput hi kan miphun nih tihal le rawlttam in a herhmi lungput a si. Ramdang le Miphun dang Nagaland, India tiang a va kal zong uar a um. Nikum Hakha CND i a paih dih in CYO Chin Person of the Year pek phu a si, ka rak ti cang” tiah social media ah a langhter.

March 7 ah tuahmi Nagaland paih ah World Paih Championship tawlrelnak in US, Delhi le Hakha telh in Chinmi minung 17 an kal kho. Hi chung in Chinmi minung 5 an i pai  kho. Cu hna cu; Rung Lian Ceu, Mang Hnin Thang, Hrang Tin Thang, Thawng Tling le Tluang Zel Thang an si. Nagaland ram pathawng bik timi paih a si i minung 62 an i pai kho. Zuamcawh paih (knock-out) in paih an thawk colh. Thawng Tling le Tluang Zel Thang hi  minung 62 paih, a round 1nak an sung colh. Mang Hnin Thang le Hrang Ting Thang hi around 1nak cu teinak an hmu nain minung 31, a round 2nak paih ah an sung ve. Rung Lian Ceu cu minung pali paih Semi final tiang a kai i semi final ah a sung. Asinain annih Naga cu laksawng hi pakhatnak in palinak tiang an ser caah semi final ah a sungmi pahnih kha pathumnak an cuhter than hna. Cu ruang ah Rung Lian Ceu aa pai kho than i atu bantuk in pathumnak laksawng a co hi a si.

Rung Lian Ceu hi US he Hakha he voi 12 tluk champion a co cangmi a si. Nihin tiang ah cun Chinmi sin ah cun pai aa timh ti lonak le miphun dang le ramdang sin ahcun paih aa timhnak kong The Chinland Post he biaruahnak ah a chim. Hiti Chinmi sin ah paih aa timh lonak a ruang bik cu Chinmi sin ah kaa paih chng paoh cu laksawng cu keimah ta a si ko lai. Cu ruang ah midang nih co ve hna seh ti a duh ruang ah a si tiah kan theih.

Na ruahning rak langhter ve.. (Leave a comment)

%d bloggers like this: