Sualnak Ngei Lo In A Ingtuartu Upadi Ning In Kan Bawmh Hna Lai; Pu Sunny Thang Cung

Salai Elvis| 2019 January 24| Upadi he aa kalh in riantuan cu ka doh bak. Cozah zong siseh mizapi zong siseh upadi ning in le sualnak ngei lo in a ingtuar tu hna zong upadi ning, kan si khawh chung in kan bawmh hna lai. Bawmh ding ah timhcia ka si tiah January 24 ah tuahmi Hakha khuachung sersiamnak kong Cozah le mizapi ton biaruahnak ah a tu bantuk in Pu Sunny Thang Cung nih a chim.

“Upadi cu cauk 600 leng a um, ukkhat te lawng na zoh ah cun na palh sual lai. Upadi cu aa thleng peng fawn. Cucaah upadi he aa kalhmi riantuannak paoh ka doh. Atu lio ka kut cung ah a ummi inn 105/106(vawlei ngeih nak ca) hi a dikmi a si tak maw si tak lo timi theih a herh. Kha naa tlaihmi 105/106 kha adeu a si sual ahcun nangmah tel in kha kong an tawlrelpiaktu an petu zung zong kha eihmuarnak in tazacuai khawh nan si. Pakhat khat biaceih zung ah chuah sual ah cun upadi ningin thong thlak colh an si.

Keimah zong hi Hakha khua kek bak ka si. Cucaah Hakha kongah buaibai a chuahpimi paoh ka doh hna, ka duh ve lo. Hlan kan pupa an i zuamnak le an cawlcanghnak thawng in Hakha khua hi khuapi tiang a phaknak a si. Cucaah an kutneh cu zeiti hmanh in aa rawk ding Hakha fa ka sinak in ka siang ve lo. A tu cozah chungah hin upadi ningin kan kal deuh i kan i ning deuh. Ralkap cozah lio vial ah hi bantuk in a chim rel ngammi an rak um bal lo. Cozah riantuan mi fianghlang tein a phuang ngam tu Media cung zong ah kaa lawm. Zei paoh hi Upadi ning tein riantuan a biapi” tiah Chin ramkulh Upadi bawizik Sunny Thang Cung nih a chim.+++

Na ruahning rak langhter ve.. (Leave a comment)

%d bloggers like this: