Suu Kyi Nih Thantlang Khuami Facang Tun 100 Le Chiti Cuai 100 A Bawmh Hna
Salai Elvis| 2019 January 20| January 20 ah rampi ruahnak petu Daw Aung San Suu Kyi cu Tikir khua Electric mei le Dam hunnak a tuah dih hnu ah Thantlang khuami hna he ton biaruahnak ah a tu bantuk in Facang (rasen) tun 100 le chiti cuai 100 a bawmh hna hi a si.
“Hi bawmhnak a kan pek mi cu zeitin kan tawlrel lai a fiang rih lo, khuanu/pa hna nih an kan ti lai maw penguk zung lei nih dik an tawlrel te lai ka thei rih lo. Town Hall ah an chiah chung ri ko” tiah khuanu/pa tuanvo ngeitu Pu Lawm Bik nih TCP ah a chim.
Aung San Suu Kyi sin ah thil phun thum zong an hal; Cozah lei nih tangka karh in cawih tawnmi cu kum sau deuh le (a karh) tlawm deuh in tawlrel piak ding, Saisihchuak lam hleidonh ding kongkau, Thantlang khua chung inn le lo kan karh tuk caah Maha-dat-aa-line mei 11KV cu mei tha tamdeuh chappiak ding in an hal hna tiah kan theih.
Amah Aung San Suu Kyi donnak an tuahmi zong a fehfuan lo caah a pur nain minung fak in aa khawng mi an um lo.
“Donnak an tuah mi a tluknak cu tung bunhnak a tha lo Congrect lam a si i cu cungah cun an toh i hri in fek tein an tem mi a si ko nain Helicopter thli a fah tuk caah a tluknak cu a si ko. Fak in a khawng mi cu an um hraw lo” tiah Pu Lawm Bik nih TCP ah a chim.
Aung San Suu Kyi cu Thantlang khuanu/pa lei nih Thi hni, kor le puan anak phun le TABC nih Sia an thahpiak i apherh (sa pherh) in an phurhter. Aung San Suu Kyi cu a tutan hin Thantlang khua avoi hnihnak a phak a si tiah kan theih.
About The Author
