Suu Kyi Pekmi Facang Le Chiti Cu Ngaktah Le Sifak An Pek Hna Lai

Salai Cung Cung |2019 January 24| Myanmar rampi ruahnak petu Daw Aung Sang Suu Kyi nih Hakha caah Facang tun 100 le Chiti cuai 100 bawmhnak a pekmi cu January 23 zanlei suimilam 3 ah sangkip khuabawi, Hakha khuanu khuapa le Hakha khua ukbawi hna tonnak an ngei dih hnu ah sifak santlai lo le ngaktah pawl bawmh ding  bia an khiah.

“Hi bawmhnak pekmi cu nizan ah tonpumhnak kan ngei i Hakha ah sang 8 an um. Cu sang 8 cu sangkhat  ah Facang tun 10 le Chiti cuai 10 cio  pek ding kan ti. Cun HBC ngaktah le Zion Ngaktah hi facang tun 5 le Chiti cuai 5 veve pekding kan ti. Bethel Tar zohkhennak caah Facang tun 4 le Chiti cuai 4. Cun Khuathar Ngaktah Sianginn pakhat le Hakhathar Ngaktah Sianginn ah Facung tun 3 le Chiti Cuai 3 veve. Hi bawmhnak pekmi pawl cu sang chung um khuanu khuapa le khuabawi nih anmah sang cio ah an tawrel te lai” tiah Hakha khuanu khuapa Pu Ral Kham nih The Chinland Post ah a chim.

“Sang chung in sifak santlai deuhmi hi innhnih ah facang tuntan kan pek hna lai. Facang pek lomi paoh kha innkhat ah chiti tholkhat kan pek hna lai. Facang pek cangmi cu chiti pek an si ti lai lo. Sang chung in sifak santlai lo kan zoh ning hna cu nuhmei le eidin awk lei a a harsa deuhmi pawl hi kan pek hna lai” tiah Pyidawta khuabawi Pu Bawi Lian nih The Chinland Post ah a chim.

January 20 in 22 tiang Chinram a tlawngmi Myanmar ram ruahnak petu Daw Aung San Suu Kyi nih Chinram a tlawnnak peng 5 ah Facang tun 100 le Chiti cuai 100 cio bawmhnak a pek hna tiah kan theih.

Na ruahning rak langhter ve.. (Leave a comment)

%d bloggers like this: