TABC Bible Conference Ah TABC Center Inn Thar Luhnak An Tuah Lai

Salai Elvis| 2018 Tho 10| Thantlang peng Baptist Association pali komh Bible Conference chung October 12 ah TABC Center inn thar luhnak an tuah chih lai tiah theih a si.

Association pali Thantlang Association of Baptist Churches (TABC), Zophei Baptist Association (ZPBA), Baptist Association of Mara (BAM) le Lautu Association of Baptist Churches (LABC) komh in Bible Conference cu October 11-15 tiang TBC Khrihfabu ah tuah a si lai i mah ni le caan chung October 12 zanlei sang in TABC Center inn thar luhnak zong an tuah chih lai.

“TABC Center luhnak cu Bible Conference he i tongdingin rak suaichung mi a si caah khual zong kan sawm hna lo. Conference a raktlung mi khual le Thantlang khua um, Khrihfabu kip upa hna le cozah zung tuanvo ngeitu hna tel in minung 1500 hrawng suaisam a si. Mah ni ah Sia pakhat le vok pahnih kan thah lai. Hi inn thar luhnak caan cu October 12 (ninga ni) zanlei suimilam 3:00 hnu in thok a si lai i khi hmun ah zanriah dumtinak tuah a si beh lai. Hi Center a inn lawng ah sing 2900 in Company nih an sak i hi pin ah a lenglei inn tual Concrete phah le hlei tibantuk kan tuah chih i a zapi in kan dihmi sing 3500 hrawng a si” tiah TABC, AGS Rev. Dr. Cung Bik nih TCP ah a chim.

TABC Center innpi cu dotli a sang i inn tangcem ah motor chiahnak, a cunglei ah khualriahnak, mi tlawmdeuh training le meeting tuahnak, Office room khan hnih le a cungcem ah minung 100 renglo Training tuahnak an um.

TABC Center innpi cu 2017 October thla in sak hram domh a si i sing 2900 dih in Hopann-mandala Company nih dotli sang in an sakmi inn a si. Hi inn cu TABC ramchung Khrihfabu sin ah thawhvo pek cio le ramleng Khrihfabu sin ah bawmhhalmi tel in sakmi a si. Thantlang peng Association pali komh Bible Conference zong a tu in avoi 4nak an tuah a si lai i cawnpiaktu ah Rev. Dr. Thla Awr Bawihrin (CBCUAS, GS), Pastor Dr. Duh Sang (TBC) le hlasatu ah Bawi Thiang Bik le Dorcus an sawm hna tiah theih a si.

Na ruahning rak langhter ve.. (Leave a comment)

%d bloggers like this: