Thantlang Ah CACC le ICCYC Fonh In Hla Civui Le Conference An Tuah Lai

Salai CungCung|2019 November 7| Thantlang ah CACC (Chin Association For Christian Communication) le ICCYC (International Chin Christian Youth Conference) i fonh in hla civui cu 2020 April 15 in 20 tiang an tuah lai tiah kan theih.

“Hi bantuk puai cu ICCYC nih Lawngtlai ah voikhat an rak tuah bal cang. Cun a voi 2nak zong Lawngtlai ah tuah than an duh nain kan tlamtling lo, tuah lo um le a tha lo  an ti caah kan mah kan tuah cia mi chung tu ah khan kan rak i tel ve lai tiin ca an rak kan pek. Cun kan mah zong nih rak i tel ve ko uh a sawm zong kan in sawm ko hna tiah kan ti hna caah kan i fonhnak hi a si. Hi program pi cu kan mah CACC nih kal pi mi a si ko” tiah CACC Art and Culture Department Secretary Rev.Dr. Khar Ling nih The Chinland Post ah a chim.

“Hmailei ah cun, ni kum ah khan Chin Idol kan tuah, tukum ah hla civui kan tuah, hmaikum lei ah cun Chin Idol hna kan tuah than te ko lai. Program kal ning cu ai thleng pah lai nain pehzulh in kan tuah peng ko lai. Hi hla civui kan tuahhnawhchannak a ruang cu, pakhatnak ah Lai hla thancho uh sih, pahnihnak  Laica le Laiholh a dirkamh tiah ka ruah, pathumnak ah Pathian kan zumhnak ah hin thangthat nung hi kan ngeih a hau, Palinak ah hlasak tinak in ramchung ramleng hawikomh nak chuah pi seh ti kan duh caah tubantuk in kan tuah hi a si. zapi nih rak kan tel pi uh tiah sawm kan hna” tiah  Rev. Dr. Khar Ling nih a chim chap.

Hi conference ah hin a bu bu in hla remh zuamnak a um lai, Pakhatnak laksawng ah tangka Sing 15, trophy le roca, pahnihnak laksawng ah tangka Sing 13 le roca, pathumnak laksawng ah Sing 10 le roca. Cun hla zuamnak a dang pawl cu minung pali hlasa, pathum hlasa, pahnih hlasa, pakhat hlasa tiin a um lai. Hi pawl cu Association pakhat cio in zuam a si lai i hla remh tu cu a tlawmbik minung 30 cung in a duh mi paoh nih i zuam khawh a si lai . Hla remh laksawng ti loin a dang hlasak zuamnak pawl cu a fiang rih lo tiah kan theih.

Hi Conference Special talk  caah khual lian sawm mi pawl hna cu, CNF in Pu Zing Cung, Australia in Pastor  Ca Lian Thang, Canada in Rev.Salai Cung Cin,  India Delhi in Dr. Par Iang Sung, Hakha in Rev. Lal Pek Lian,  Cun Mean speaker zarhpi zing thawngtha chimtu ah Rev.Dr. Steven Hre Kio an si lai tiah kan theih.++++

 

Leave a Commnet

%d bloggers like this: