Thantlang Kahdohnak Ah CNA, CDF Lei 13 An Nunnak A Liam, 10 Leng An I Hliam
The Chinland Post | 2023 August 29 — Chin ramkulh, Thantlang khua ah a um mi SAC ralkap sakhaan cu CNA hruainak in Chin hriamtlai phufonh nih an va kah hna i chunitlak kahdohnak a fak. Kahdohnak chung ah CNA, CDF phufonh lei in 13 an nunnak a liam, 10 leng an i hliam tiah CNF/A biachimnak nawl a ngeitu Salai Htet Ni nih Khonumthung Burmese ah a chim.
August 28 zinglei sml 5:00am hrawng ah CNA, CDF-Thantlang, CDF-Hakha le CDF-Zophei phufonh hna nih Thantlang khuachung ah a um mi SAC ralkap Battalion cu an va kah hna, SAC ralkap nih hmun 4 in an rak kah ṭhan ve hna, Jet Fighter nih kah a bawmh hna leng ah hriamngan lung tamtuk hmang in an sakhaan cu an kham tiah CNF/A nih an chim.
“Mipi lei ah CNA, CDF-Thantlang, CDF-Hakha, CDF-Zophei hna bawm in Thantlang khua SAC ralkap sakhaan cu kan va kah. Anmah lei hi hmun 3/4 hrawng ṭhen in hmunhma an rak la. Hmakhat te ah kan va kah hna. Cu lio ah Jet Fighter nih kanmah lei ah bom a rak thlak, hriamngan in voi tamtuk an kan kah. Cuticun kanmah lei 13 an nunnak a liam, hliam a tuar mi cheukhat an um. Anmah lei zong a thi mi le hliam a tuar mi an tam ve. Anmah lei a thi mi cazin cu a fiang in cun kan thei rih lo” tiah CNF/A biachimnak nawl a ngeitu Salai Htet Ni nih Khonumthung Burmese ah a chim.
August 28 chunitlak kahdohnak chung ah CNA ralkap 6, CDF 7 nih ram le miphun caah an nunnak an pek i SAC lei 30 hrawng an thi kho, hliam a tuar mi zong an tam ko nain a fiang in theih a si lo tiah a chim fawn.
SAC ralkap sakhaan lei nih hmun 4 in an rak khamh hna i an rak kah ve hna leng ah vanlei le hriamngan bawm in an sakhaan an khamh. CNA, CDF phufonh lei nih Drone bawm in an kah hna hi a si i August thla chung ah sakhaan voi 2 an va kah cang, SAC lei nih vanlei kahdohnak le hriamngan voi tamtuk a hman caah CNA, CDF phufonh lei a nunnak a liam mi an tamnak a ruang hi a si.
“Kahdohnak he pehtlai in kanmah lei a thi mi an tam bantuk in anmah lei zong a thi mi an tam. Hriam cheukhat zong kan lak khawh. A fiang in chim khawh a si rih lo. Kahdohnak hi pehzulh in a chuak kho mi dirhmun a si. Anmah lei zong timhtuahnak an ngei. Kanmah lei zong a ṭha bik in timhtuahnak kan ngei ve” tiah CNF/A biachimnak nawl a ngeitu Salai Htet Ni nih cun a chim.
August 14 ah Thantlang khua, SAC ralkap Haukabung sakhaan cu CNA, CDF-Thantlang, CDF-Zophei le CDF-Hualngoram hna bawm in an va kah hna i SAC ralkap 3 an thi, 2 a nung in an rak tlaih hna.
Cu lio kahdohnak chung in RPG 2, meithal zuun 3 leng ah adang kuanzen pawl zong CNA, CDF phufonh nih an lak khawh i SAC ralkap hliam a tuar mi pawl kha Hakha sizung ah an thlop hna tiah theih a si.
Reference: Khonumthung Burmese
About The Author
