Thantlang Khua Ah Tint Tint Myanmar Group of Companies Hotel Zone Sak Rian An Thok
Salai Elvis| 2018 November 6| Daw Tin Tin Lwin nih Thantlang khua ah Hotel zone sak rak timhtuahmi rian cu October 11 in riantuan hram an thok cang tiah theih a si.
Hi hmun cu Lungler lam kam (Kalvary hlawhtling thlacamnak hmun pawng) ah ekah 11 tluk a kau mi hmun a si i inn fa tete phun in inn 20 le ti lionak le a dangdang inn sak dingin rian an thok hi a si.
“Inn sak cu October thla khan kan thok cang kan duh ning ah 2019 January thla chungah hunnak tuah kho dingin kan timh tuah. A tlam tlin deuh lo sual ah cun 2019 kum chungah cun a si te ko lai” tiah Tint Tint Myanmar Group of Companies Hotel saknak kongah tawlrel tu pakhat nih The Chinland Pot ah a chim.
Hi Hotel chung riantuan tu dingah July 26 in August 5 tiang khuate lei he telh in Thantlang khua chungum mi minung 80 cu Training pek an si. Hi chungah an dihlak rian pek an si lai lo tiah theih a si.
“Zarhhnih chung Training rak pek mi hna cu an dihlak in Hotel chung riantuan dingin rian pek an si lai lo. Training a kai mi chungah kan thim te hna lai i hi hnum ah riantu tu pazeizat dah a herh timi kan zoh chom te lai. Hotel inn sak a dih in hi hmun ah thlakhat chung Trianing pek than an si lai” tiah tuanvo ngeitu pakhat nih a chim.
Training zarh hnih tluk an pekmi hna chungah a bik in mi donning ningcang (Front Office), pawngkam humhimnak vengtu (Security), Housekeeping, chumhchuan ning (F&B), Kitchen le Waving pawl hi an si. Mah ni ah Training kai mi hna nih Lailaam hmuhsaknak, hlasaknak le an cawnmi chungin hmuhsaknak zong an tuah hna tiah theih a si. +++
About The Author
Mak lai hih