Thantlang Khua Inn Kang A Tong Mi Hna Cozah Le TYA Mino Hna Nih Sing 64 Renglo Bawmhnak An Pek Hna

Salai Elvis|2020 January 15| January 12 zantim ah a cangmi Thantlang khua sianginn sang um Pu Sui Peng, Pu Chan Lian inn le Pu Ngun Bawi inn (zatceo) kangh-uhnak a tong mi dawng hna le a thi mi hna caah Chin ramkulh cozah le Thantlang mino (TYA) hna nih sin in bawmhnak tangka sing 6,489,500 tluk a chuak tiah theih a si.
Kangh-uhnak an ton zing (January 12) ah ramkulh cozah tuanvo ngeitu cheukhat hna nih bawmhnak le thazaang pek nak an ngei hna. Mah ni ah ramkulh cozah nih inn thum a kangmi caah sing (9), a thi mi pahnih caah sing (6) le sii zung aa thlop mi pahnih caah sing (2) a dih lak sing (17) pin ah ramkulh rawhralnak kongkau tawlrel tu hna zung nih inn thum a kang mi caah sing (6), a thi mi pahnih caah sing (6), hliam hma tuar in sii zung ah a um mi pahnih caah sing (1) le kangh-uhnak a tong mi inn chungkhar minung 15 caah zarhkhat chung an eidin rawl caah (ks. 31,500) a zapi sing (1,331,500) pin ah Thantlang peng uk zung, khua nu/pa, Company le kutsamhtu dangdang hna sin in sing (13). Mah pin ah thla 12 ni ah Chief Minister Salai Lian Luai, Hluttaw Speaker Pu Zo Bawi le Lam le sul vuanci Pu Sui Thio hna nih a hmun ah kal in bawmhnak le thazaang peknak zong an ngei hna i CM Salai Lian Luai pumpak nih kangh-uh a tong mi hna caah sing (1), Pu Zo Bawi nih sing (10) le Pu Sui Thio nih sing (2) tiin bawmhnak an pek hna tiah theih a si.

Cun Thantlang Youth Association(TYA) mino hna nih an mah chung hruaitu upa hna sin in siantawk le dawrthluan kip ah siantawk bawmh an hal mi hna chung in ks.858,000 a chuak. Cu chungah chungkhar pathum, dawngkhat ah Ks.230000 cio, thilri herhhai pinah a thimi pahnih zong pakhat ah Ks.50000 cio bulh an pek hna.
“Dawr thluan kip (80) renglo kan kholh hna i an mah le siantawk cio an kan pek. Mah pin ah kan mah TYA chung in OC le EC upa zong 5000-10000 tibantuk kan i kholh cio mi chung in a chuak mi a si. Dawtnak le zawnruahnak he kut a samhtu dawr ngeitu le pumpak pakhat cio cungah kan i lawmtuk.” tiah TYA hruaitu upa pakhat nih a chim.

Atubantuk in a fakngai mi kangh uhnak an ton hi 2020 kum thar chungah a voikhatnak bik ngeihchiatnak an ton zong a si i cu chungah inn hnih thilri zeihmanh chuahmanh lo in a ciam dih. Inn khat zong hrapkhat a kang dih ve. Hi chung ah kum 90 tluk a si mi Pu Chun Lian le Pa Simon (kum 10) hrawng a kangh chih hna i minung pahnih hliamhma tuar in sii zung an phan. Hi inn kanghnak ruangah Transformer (200) KVA pakhat le Panel Box lungkhat a dihlak sing (220) man tluk a kangh chih. +++