Thantlang Khuacuanhnak Tlangah Pu Lal Luai, Pu Van Kulh Le Vice President Pu Henry Van Thio Lung An Phun Lai
Salai Elvis| 2018 April 18| Thantlang khuacuanhnak tlang (View point) ah hlan lio Thantlang peng chung in min ngeimi hna Pu Lal Luai, Pu Van Kulh le a tu lio Kawlram Vice President Pu Henry Van Thio philhlonak le conglawmh upatnak caah sinpin nih lungdonh tuah piak an timh tiah thawng kan theih.
“Hi chungah Pu Lal Luai, Pu Van Kulh hna an tuanbia cu tling tein tial kan timh i kan pa Jesey pa Vice President Pu Henry Van Thio tu cu a tu ni tiang a tuanbia kan tial chung lai i hmailei a tuanbia tial thannak ding caah kan zuah lai i pehzulh in a lung lila kan tial than ve te lai. Hi lungphun kongah a mah Vice President zong kan chimh cang. Mah lungphun nak caah cozah nih chiah piak mi budget aa tel lai lo, kanmah nih kan kawl chom lai. Tuan ah tangka kan hmuh ahcun tuan ah kan lim ve ko lai. Hi lung cu pakhat caah Pe 12 sang, a vaang pe 5 le a chahpen pe 1 chah in a si lai. A tu hi lung zong aphan cang, tukum chungah kan tuah kho te hnga dik maw”tiah sipin Committee Pu Ram Khar nih TCP ah a chim.
Pangpar dum caah budget a dang tein an hal tikah Bogyoke Aung San milem lawng si lo in Thantlang peng chungin hlan lio pupa hna milem zong tuah an timh tiah theih a si.
“Online media chungah a chuak mi chungin hlan lio kan pa le milem zong chiah ding in timh tuahnak kan ngei ko, pangpar dum caah budget dang tein kan hal tik tu ah a mah,! timi chuah pi cio hna sehlaw an milem zong kan chiah ve ko lai, cu pin ah tuah chiah ve hrimhrim dingin kan suai cia mi chungah an i tel ve thiam ko. Ram dang um mi pakhat nih Pu Thio Mang milem zong keimah nih kan sponsor hna lai a ti i a tha tuk, a biapi cu tangka hi a si ko. Sponsor hna an um ko ahcun rangtuk in kan tuah khawh colh lai.” tiah Pu Ram Khar nih a chim.
Hi kong he pehtlai in MP Pu Bawi Khing nih “ Pu Lal Luai philhlonak caah pumpululh chuihnak certual a mah min kan pek mi hi a za ko, a mah philhlonak caah a mah min in pahnih tuah a hau lo.” tiah April 17 ah TCP ah a rak chim.
About The Author
