Tikir Khua Sianginn Foundation An Sakning A That Lo Caah A Thar In An Sakter Than Hna
Salai Elvis| 2018 April 3| Thantlang peng Tikir khua siangsangruun then (thah-khuai) an sakmi cu a foundation a that lo caah an ngolter hna i tukum May thla dih hlan ah sakdih dingin biakamhnak an ngei tiah thawng kan theih.
“Foundation a that lo caah a voikhatnak zohfeltu Engineer an ra. An hrawhter than dih hna hnu ah engineer le riantuantu zong an thlen dih hna i a dang an vun thlah than hna. March thla chungah khan lim cang ding a si nain, a hmun cawhnak ding caan a la deuh caah caan sauhpiak dingin an hal than i May thla dih tiang ah lim ding in caan an pek than hna. Zeitik an dih lai hngalh khawh a si rih lo” tiah Tikir Thar khuabawi Pu Lian Thang nih TCP ah a chim.
Royal Lotus Company nih budget sing 2000 renglo in an sakmi a si. Hi inn cu 140 x 30 RC dot hnih in an sakmi inn a si. Thantlang peng chungah tanghra sianginn a ngei ko nain siangngakchia a ngei lo mi khua ah Tikir khua hi aa tel ve mi a si.
“Cachimtu saya/ma tling tein an ka pek khawh lo ruangah khua ah tanghra kai lo in khuapi chungah an kai dihnak hi a si” tiah Pu Lian Thang nih a chim. +++
Photo: Salai Cung Khenglawt
About The Author
