Thantlang Sii Zunguk Bawi Ralrin An Pek
Salai Elvis| 2018 September 6| Thantlang sii zung ah Pi Lal Din Rem nau rawhnak in a thih nak kongah sii zunguk bawi cu September 5 ramkulh ngandamnak zung lei nih an auh i ralrinnak an pek tiah theih a si.
Ramkulh ngandamnak zung tuanvo ngeitu a si mi U Nang Hung nih “ramkulh ngandamnak zung lutlai nih September 5 ah zungkip hna hmaiah ralrinnak a pek. Thantlang sii zunguk bawi zong mithar a si tikah Thantlang siizung kongkau a thei tuk rih lo. Ramkulh ngandamnak zung bawi zong nih riantuan nak kongkau zong tampi a chimh chap rih. Thantlang sii zunguk bawi zong nih a rian a tlamtlinh lonak kong zong aa theih ve” tiah a chim.
Thantlang sii zunguk bawi cu ramkulh lei nih phungning in ralrinnak ca zong an pek than lai. A tu lio Thantlang sii zunguk bawi cu Teih-ne siizung in siizung pi ah a rian a kai mi a si i thla khat fai lawng a um rih mi a si.
Pi Lal Din Rem (kum 28) cu Thantlang siizung ah a chung mizaw in August 9 ah aa thlop i August 11 zinglei sml.9 ah a fa (thla li fai) he an nunnak a liam mi kongah ramkulh ngandamnak zung nih tubantuk in sii zunguk bawi an auh i ralrin an pek nak hi a si.
(Ref: Chin World, TCP)
About The Author
