Thantlang Sipin Nih AG Khrihfabu Hmu Chimh Ta Lo In Pangpardum Tuahnak Caah An Chunhpiak Hna
Salai Elvis| 2018 Tho 9| Thantlang sipin nih pangpar dum le Aung San milem chiahnak ding hmun an chunhmi chungah AG Khrihfabu hmun ekah 1 tluk cu anmah chimh ta lo in an hmun an chunhpiak hna caah an lungtling lo tiah theih a si.
“October zarkhatnak ah Sipin nih khualuh hauka chak (Farhualbo) pangpar dum le Aung San milem chiahnak ding caah hmun an chunhmi chungah kanmah AG Khrihfabu hmun Pu Peng Mang nih ekah 1 tluk an kan cheuhmi cu kanmah theih lo in thirhrihling kulhmi cu an hrawh i an cawh caah penguk zung ah October 5 ni ah ca kan chiah. Hi hmun cu tuanpi in Pu Peng Mang nih a kan cheuhmi hmun a si i phungning in pungsan 205-106 ngeih khawhnak dingah kan tawlrel cuahmah i cozah zung pasarih sin ah a herhmi ca kan lak dih cang i anmah sipin zung ah vothum tiang ca kan lak i an kan pe duh lo. Kanmah theih lo in kan hmun an kan cawhpiak tikah penguk zungah ca kan chiah cu a si” tiah Thantlang peng AG Section GS Rev Biak Cung nih TCP ah a chim.
“Hi hmun cu sipin nih mizei hmanh hmun pek lo dingin mizapi tlonlennak caah le pakhat khat tuahnak ding caah tuanpi in kan hualmi a si. AG Khrihfa bu nih voi thum catlap (thoh-khan-sar) an rak lak nain ka pe duh hna lo, a ruang cu khi hmun cu mizapi tlonlennak caah kan humhak mi hmun a si ka ti hna. Pu Peng Mang nih khi chungah ah khin 105-106 hmun hnih a rak ngei ko nain tha tein kan chimh i khua thanchonak caah a si ahcun tiin kadang ah hmun nan ka pek lai tiin hnatlaknak zong kan ngei kho. AG Khrihfa bu hmun zong penguk zung lei nih hmundang pekdingin a ti hna” tiah Sipin lutlai Thluai Iang nih TCP ah a chim.
“Kan hmun kongah penguk zung nih hmundang tu i sawh u law kan in pek hna lai an kan ti caah hmun kan kawl lio a si. Kanmah kan duhnak te kan i sawh lai i an kan pek khawh than lo a si cun hinak fak deuh in cunglei President sin tiang ca kan chiah cang lai. A herh ahcun lam zong kan zawh lai” tiah Thantlang peng AG Section lutlai pakhat nih a chim.
Hi hmun cu Sipin nih pangpar dum le Aung San milem chiah an timhnak hmun a si i hi kongah a bik in milem chiah te ding zong kan duh lo, milem kan herh lo tiin Thantlang khua zatlang bu kip hna nih October 15 lam zawh in duhlonak langhter ding in cozah sin ah ca an chiah cang tiah theih a si.
About The Author
