Thantlang Zatlang Bukip Fonh Nih Aung San Milem Chiahtimhmi Lamzawhnak In Duhlonak An Langhter Lai
Salai Elvis| 2018 Tho 9| Thantlang khuachungah Bogyoke Aung San milem chiah timhmi kongah Thantlang khuachung zatlang bukip fonh ai-awhtu a si mi hna nih October 15 ni ah lamzawh in duhlonak an langhter lai tiah thawng kan theih.
Thantlang khuachung zatlang bu ai-awh tu a si mi hna, Thantlang Youth Association (TYA), Thantlang Sianghleiruun Chungkhar (TSC), Chin Family Group (CFG) le Chin Women Support Organization (CWSO) nih duhlonak lamzawh dingin October 8 ah cozah zungah ca an chiah cang.
“Sing 300 dih in pangpar dum le Aung San milem tuahtimhmi cu pangpar dum tuahnak ca lawng ah kan hman than lai i milem tu cu pumpak in a hlutu an um si cun kan tuah ve te lai. A ruang cu Aung San milem chiahtimhmi kongah bia a tamtuk caah a tubantuk in cunglei nih pumpak in a hlutu an um si cun tuah te u an kan ti caah a si” tiah Thantlang sipin lultai Thluai Iang nih TCP ah a chim.
“A milem hrimhrim Thantlang ah chiah kan duh lo. Cozah budget in an tuah pek pumpak hlutmi tangka zong in tuah kan duh lo caah a tubantuk in lam zawh kan i timh hi a si” tiah lamzawhnak dingkong ah tawlrel tu upa pakhat nih TCP ah a chim.
October 15 ni lamzawh pah in duh lonak langhter dingmi hna cu; Thantlang khua ah Aung San milem kan herh lo, Aung San (panglong) biakam kan herh deuh. Mizapi ruahnak lakta lo khuakhan kan duh lo, timi le Chin miphun cu milem sermi miphun kan si lo timi hna hi an au pi dingmi cu a si.
Hi lam zawhnak cu zinglei suimilam 7 ah minung an i pumkhawm lai i 8:00 ah minung 400 tluk nih lam zawhnak an thok lai. Sangthen No.3 (BEHS No.2 sianginn lam pial) nak in Sianginn sang Khuafo lampial tiang zanlei suimilam 1:00 tiang lamzawh ding in caan suaisam chung a si.
Aung San milem le pangpar dum cu Thantlang ah tuah le chiah dingin ramkulh sipin budget sing 300 rak hal a si. Mah tangka chungin milem caah sing 75 (Thantlang a phak tiang) dih in le a hlei mi sing 220 renglo in pangpar dum tuah ding tiin 2018 September zarhthumnak ah sipin Committee, khuanu/pa, Hluttaw palai cheukhat le tuanvo ngeitu hna nih bia rak khiah cangmi a si. Asinain cunglei nih cozah tangka sing 300 chungin milem tuahnak caah hman lo ding le milem tuahnak ca cu pumpak in a hlu kho mi an um si le tuah te ding in nawl an rak pek than hna hi a si.
A tu bantuk in cunglei nih nawl a peknak hna cu milem le pangpar dum tuah dingin riantuantu ding Company nih aa leet than caah ramkulh tawlreltu hna sin ah nawl an rak hal bal tiah kan theih.
October 9 ahkhan cozah lei tuanvo ngeitu hna nih an auh hna i lamzawhnak tuah hlah uh tiah an nawlpat hna. Cucaah, Zatlang bu pawl October 9 zan ahkhan ton biaruahnak an ngei i lamzawhnak tuah lo in phunthum in cozah sin ah an duhnak cachiah than ding tu in timhlamhnak an ngei tiah kan theih.
Biakilh: Thawng fiang deuh in (update news) kan van in thanh than colh te hna lai.
About The Author
