Tial Cung Thang Le Cambodia Pa March 8 Ah An I Thua Cang Lai

TCP-Hakha| 2019 February 5| 2019 January zarhhnihnak ah MMA he hnatlaknak biahren min a thu cangmi Chinpa Tial Cung Thang le Cambodia pa Rin Saroth cu a ralaimi March 8, Myanmar ram Yanogn khuapi chung Thuwanna ah i thua ding in One Championship nih an fehter cang.

Tial Cung Thang hi 2013 hrawng in MMA ah thuat cinh hram a thawk cang. Tutan hi MAA ah a hmasa bik aa thuat a si lai. Amah he aa thua dingmi Cambodia pa Rin Saroth hi voi 5 aa thua cang i voihnih lawng teinak a hmu i voithum a sung. Rin Saroth hi kum 25 a si i pe 5.6 a sang. A khing hi pound 143 fai a si.

“Keimah leikap in atu bantuk biahrennak min kan thut khawh caah kaa lawm. Keimah leikap in Myanmar ram i thapetu hna he i tonding ka hngak kho ti lo, kaa ngaih tuk cang” tiah MMA he biahrennak an tuah lio ah Tial Cung Thang nih a facebook a tial.

Tial Cung Thang aa thuatnak video;

 

“MMA i ka luhnak a ruang bik cu World Champion si duh ruah asi ko. MMA ah teinak hi atu tiang cu chim awk tlak ngai um rih lo. Atu tan kaa timh tuahning hi a tha ngai ko. Ka family kaltak in khua dang ah training ka la. Zing he zan he training tuah zungzal asi, cun ka cinhti mi pawl hi minthang le Pa Thawng lawngte an si. Anmah pawl he ka cinh zungzal tikah tampi zumhngamhnak (confident) a ka ngeihter. Dam tein ka Biak mi ka Pathian nih a ka umpi lai i teinak zong ah ka Pek ko lai tiah ka zumh. Ka vuikhatnak asi lai i Chin miphun ka unau nan thlacampiak le nan thapeknak ka herh tuk” tiah Tial Cung Thang nih The Chinland Post ah a chim.

Tial Cung Thang hi Bantamweight ah aa thua lai i caan khatkhat cun World Champion laksawng a co khotu a si te lai ti a zumhnak kong Aung La Nsang nih a chim.

Tial Cung Thang cu atu hi Florida (USA) ah a um lio a si. USA wrestling i thuatnak New York State championship voihnih a co bal cang. Cu pin ah BJJ Brazilian Jujitsu ah blue taisawm zong a rak co bal cang.

Rin Saroth aa thuat lio i a sunghnak video;

Lai paih hi vui 5 bual a co, CND le Tho Puai ah. Vuikhatnak bual a rak kiar hi kum 18 a rak si lio ah asi i 2013 ah zatlang he zuamcawh he bual a rak co. Mah kum ah Peng Awi, Kap Tawng, cun Aung Kyaw Lin a rak tei hna. 2014 ah zuamcawh ah a co than, mah kum ah cun Rung Lian Ceu, Mang Cung Lian, Tial Uk, cun Kap Tawng a rak tei hna. 2017 ah heavyweight timi ah bual a co than. Cun 2018 ah middleweight ah a co than.

Tial Cung Konglam Tawi
Tial Cung Thang a chuahkehnak cu Hakha Khuathar a si. A nu le a pa hi Pu Tawk Cem le Pi mang Si an si. Unau chuakti khat pali an si i far pathum a ngei, amah lawng hi pa a si. 2005 kum ah Malaysia a phan. Cun, 2007 ah Syracuse, New York, USA ah an chunglingte in an phan. Hika ah high school zong a dih. Atu lio a umnak cu Florida ah a si.

Na ruahning rak langhter ve.. (Leave a comment)

%d bloggers like this: