Tuzan Hakha Ah Fiakfairock Band Nih Concert An Tuah Lai
Salai Cung Cung |2018 October 4| Tuzan (October 5 zan) Hakha ah Chin ringawn phu pakhat a simi Fiafaikrock Band nih ks. Sing 25 dih in Carson Hall ah concert an tuah lai tiah kan theih.
“Hi Concert cu kanmah Fiakfairock Band nih kan tawlrelmi a si. Hi Concert caah hin a lenglei in a kan bawmtu hna cu Main Sponsor in Chin Galaxy Private School le Promise Company an si. Cun pumpak in Myo Myo Cycle Dawr le Salai Ral Peng an si. A zapi bawmhnak hi Sing 17 kan hmuh i hi Concert caah dih dingin kan timhtuah mi cu tangka in Sing 25 hi a si. Tutan kan Concert ah hlasatu hi minung 11 an si lai. Kanmah Fiakfairock Band chung lawng si lo in a lenglei kan hawile Hakha chung ummi zong kan sawm chih hna. Ticket hi a zapi sawng 1200 in kan chuah i Hakha khuachung Mino Groups le Biaknak lei Mino nih a kan zuarpiak. Hi Ticket cu pakhat ah ks. 2000 in zuar a si i a zuartu nih 1500 an i lak Iai, kanmah nih 500 kan i lak ve lai” tiah Fiakfairock Band Chairman Dawt Lian Bik (A lian) nih The Chinland Post ah a chim.
“Hi Fiakfairock Band Concert nih kan i tinh bikmi cu kan Lai mino pawl nih hmailei hlasaknak lei kan thancho khawh nakhnga le Laimi lakah ringawn tum thiam le hlasak thiam tampi kan chuah khawh nakhnga a si. Mizapi lei zong nih thazaang tampi kan pe peng rih u law, hmailei zong ah pehzulh peng khawh kan i zuam lai” tiah a chimchap.
Tutan Concert ah hlasatu hna cu; Cung Hlei Lian, Paling, Thawng Van Mang, Lungtum Kheng, Clinton, P. Cung Lian Thawng, Van Siang Mang, D. Thawng Aa, Ruth, Dawt Chin Sung le Mercy an si tiah kan theih.
Hi Fiakfairock Band cu 2013 February le March in rak thawkmi a si. Tukum he hin avoi 4nak concert an tuah a si cang lai. Hakha le Thantlang ah hman bikmi ringawn tumtu phu zong an si. Chairman ah Dawt Lian Bik (a lian) Secretary ah Nun Ceu Mang (Ta Ceu), cun a bawmtu ah Zomi (Ami) , Treasurer ah Lian Bawi, a bawmtu ah Kyaw Kyaw an si tiah kan theih. +++
About The Author
