US Nih Ramkomh Myanmar Ralkap Dantat Ding In UN Ah A Chim

Aung Aung| 2018 February 15| UN ah US Palai a si mi Nikki Haley nih UN runvennak council dirhmun in Rakhine ramkulh i minung covo buar nak a cang mi kong ah tuanvo ngeitu Ramkomh Myanmar Ralkap bawi pawl hi dantat ding le State Councilor Daw Aung San Suu Kyi zong hi mah bantuk tuksapur thil a cangmi kong ah biatak thlak deuh in khua a ruah le rian a tuan ding ah UN nih nam deuh uh tiah a chim.

Ramkomh Myanmar cozah chung ah nawl ngeitu hna nih Rakhine ramkulh i miphun cihmih nak a cang mi hi a si lo tiin sawtphet in an hal nak kong zong Runvennak Council ah cun a chim. Cu leng ah cubantuk in an al mi thil cu hohmanh nih a si ko, nan al mi hi thil dik a si lo tiih kan sawh chih khawh nak hnga lo Runvennak Council tel in ramkip phu pawl zong Rakhine ramkulh ah luh le thil sining hlathlai ding nawl an kan pe duh lo. Cun Reuters thawngthanhphu nih an thanh mi Indin khua mithah nak kong zong hi zoh tikah minung sinak ralchanh in tuahmi tihnung thil a si tiah US palai nih cun a chim.

Cu he aa peh in Ramkomh Myanmar ram chung ah Media zalonnak hi um lo awk tha loin a herh nak kong le Reuters thawnglatu an tlaihmi hna zong thlah ding in a chim chih.

Cawnni hnih ah tuah mi UN Runvennak Council tonpumhnak ah Britain, Netherlands, France, Sweden tibantuk ram pawl aiawh tu palai cio zong nih Ramkomh Myanmar ram chung miphun ning in thahnawnnak a um mi le thawnglatu an tlaih mi hna kong ah soiselnak fak piin an chim. US i Myanmar Palai tu nih cun Indin khua ah i an thah mi minung 10 hi ARSA ralhrang an si tiin a chim.

Hi chung ah Bangladesh ramdang pehtlaihnak minister pakhat Shahriar Alam nih an ram a phan mi EU hluttaw phu he Cawnni li i tonnak an ngeih lio ah EU ram pawl nih hin Rohingya pawl Myanmar nih a lak than hna nak ding biatak tein nan hnek a herh tiah a chim. RFA Burmese

Na ruahning rak langhter ve.. (Leave a comment)

%d bloggers like this: