Vice President Sinah Matupi Nih Kokek Ralruangah A Rawkmi Remhthan Ding An Hal Lai
Salai Elvis| 2019 April 23| Matupi khua kokek ralruang ah a rawkmi hmunhma pawl cu siamremh than dingin Vice President Pu Henry Van Thio sin ah kan hal lai tiah Ramkulh Hluttaw palai Salai Aung Lian nih a chim.
“Khuanu/pa hna he i chimhruah in Henry Van Thio sin ah thil hal ding kan suaisam lio pi a si. A tulio ah cun kokek ralruang ah aa rawkmi tihnung a si mi pawl, fakngai in luti a luannak pawl, inn tiang a rak cim cangmi pawl hal le remh piak dingin a bik in kan timhtuah mi a si” tiah MP Salai Aung Lian nih a chim.
Tutan Vice President Pu Henry Van Thio Laitlang a tlawn hnawhchan bikmi cu khuaram thanchonak kongkau zohfel ah a si tiah sipin Minister U Soe Htet nih a chim.
Mindat zatlang bu U Mang Om nih, “Kannih Mindat khua ah cun mizapi he tonbiaruahnak ngeih ding timi a um lai lo, a lan colh lai tiin thawng theih a si. Mizapi he ton bairuahnak hna um ding siseh law kan mah zatlang bu min in tonnak le kan herhmi chimphuan ding tamtuk kan ngei. Tonnak um sual seh law a bik in kan biahal ding mi hna cu; riantuan ding an ngolmi pawl pehzulh thannak, Chin ramkulh khuapi pakhat le pakhat Budget aa tluk ruan lo tuknak kong le Chin ramkulh cozah nih rian a tuan lo mi pawl chimphuan ding kan i tim” tiah a chim.
President Pu Henry Van Thio cu Kanpetlet, Mindat, Matupi, Hakha le Thantlang khua ah a tlawng lai. Kanpetlet, Mindat le Matupi khua cu Vice President a tuan hnu in avoi hnihnak a phak a si lai tiah kan theih.
Ref: Chin World
About The Author
