World Champion Co Aa Timmi Tial Cung Thang Konglam Le Champion A Co Balnak
Tawk Tling Thang| 2019 February 4| World Champion si duh ruang ah MMA ah a lutmi Chin pasaltha Tial Cung Thang cu a rauh hlan ah Myanmar ram ah ra in aa thong cang lai. Amah hi Lai paih zong a thiam ngaimi le champion voi 5 a co lio ah Kap Thawng le Rung Lian Ceu zong a rak tei hna. Cu pin ah USA wrestling New York State Championship voihnih le BJJ Brazilian jujitsu ah taisawm a co balmi zong a si. Wrestling aa thongh hramthawknak, Lai paih champion a conak le amah konglam pawl The Chinland Post careltu sin ah kan hun langhter.
Tial Cung Konglam Tawi
Tial Cung Thang a chuahkehnak cu Hakha Khuathar a si. A nu le a pa hi Pu Tawk Cem le Pi mang Si an si. Unau chuakti khat pali an si i far pathum a ngei, amah lawng hi pa a si. 2005 kum ah Malaysia a phan. Cun, 2007 ah Syracuse, New York, USA ah an chunglingte in an phan. Hika ah high school zong a dih. Atu lio a umnak cu Florida ah a si.
MMA zuamnak a tuahtu Singapore hrambunh One Championship he wrestling i thong ding in 2019 January zarhhnihnak ahkhan phungningte in biahrennak minthutnak an ngei cang. Aralaimi March thla chung i Myanmar ram Yangon ah tuahdingmi MMA thongh zuamnak ah a hmasa bik aa thong lai.
“Keimah leikap in atu bantuk biahrennak min kan thut khawh caah kaa lawm. Keimah leikap in Myanmar ram i thapetu hna he i tonding ka hngak kho ti lo, kaa ngaih tuk cang” tiah Tial Cung Thang nih a chim.
MMA Aa Thuat Dingmi Kong Ah A Chimmi
1. Atu kan i thuat dingmi hi a min chim awk tha rih lo nain a khua cu Cambodia ah asi.
2. MMA kaa thawk hi 2012 or 2013 hrawng in a si cang.
3. MMA i ka luhnak a ruang bik cu World Champion si duh ruah asi ko. MMA ah teinak hi atu tiang cu chim awk tlak ngai um rih lo.
4. Atu tan kaa timh tuahning hi a tha ngai ko. Ka family kaltak in khua dang ah training ka la. Zing he zan he training tuah zungzal asi, cun ka cinhti mi pawl hi minthang le Pa Thawng lawngte an si. Anmah pawl he ka cinh zungzal tikah tampi zumhngamhnak (confident) a ka ngeihter. Dam tein ka Biak mi ka Pathian nih a ka umpi lai i teinak zong ah ka Pek ko lai tiah ka zumh.
5. Ka vuikhatnak asi lai i Chin miphun ka unau nan thlacampiak le nan thapeknak ka herh tuk.
Lai Paih Ah Bual A Conak
Lai paih hi vui 5 bual a co, CND le Tho Puai ah. Vuikhatnak bual a rak kiar hi kum 18 a rak si lio ah asi i 2013 ah zatlang he zuamcawh he bual a rak co. Mah kum ah Peng Awi, Kap Tawng, cun Aung Kyaw Lin a rak tei hna. 2014 ah zuamcawh ah a co than, mah kum ah cun Rung Lian Ceu, Mang Cung Lian, Tial Uk, cun Kap Tawng a rak tei hna. 2017 ah heavyweight timi ah bual a co than. Cun 2018 ah middleweight ah a co than.
Wrestling Ah Champion A Conak
“Lai paih hi ka kal tak bal lo nain kei cu ka ngakchiat tein USA wrestling kha a rak i thua zungzalmi ka rak si i New York State Championship zong vui 2 ka rak si. BJJ Brazilian jujitsu zong ah blue belt ka si” tiah Tial Cung Thang nih The Chinland Post ah a chim.
“A dang lente kaa celh ruang ah hin midang bantuk in kaa Pai kho lo i a si. Lai paih cu kaltak awk tha mi asi lo. Kan nunphung pei asi cu. Hmailei zong ah paihnak um ah cun kaa pai than ko lai” tiah a chimchap.
Tial Cung Thang hi MMA ahhin caan khatkhat ahcun World Champion taisawm cotu a si te lai ti a zumhnak kong World Champion cotu Aung La Nsang nih a chim.
Hi bantuk i thonghnak ahhin Tial Cung Thang tluk in Chin pasal aa thongmi an um rih lo tiah kan theih.
Tial Cung Thang cu tuang ah tlaih bu thuat a thiam ngai. A mi thong le chuih zong a tha ngaimi a si. 2018, kumdongh lai ah miphun dang pa he an i thua i Tial Cung Thang nih a tei. Tial Cung Thang cu March 8, 2019 ah Yangon um Thuwunna Innchung Buan ah “Reign of Valor” timi tlangtar in aa phomh tiah theih a si.
Hika ah Tial Cung Thang facebook link.
https://www.facebook.com/tialthangzathang93/timeline?lst=100000882900068%3A1362529737%3A1549259323
Hika ah Tial “The Dragon Leg” Thang facebook page link.
Photo: Tial Cung Thang facebook
Hngalhternak: A cunglei thil sining vialte khi amah Tial Cung Thang biaruahnak kan tuahmi chung in aa tlaknak le aa remnak in tialmi a si. The Chinland Post sin nawlhalta lo in data laak kan siang lo.
About The Author
