Yale University Kainak $70,000 A Ngahtu David Stanley Ngun Thang Mang He Tonbiaruahnak

The Chinland Post| 2019 June 12| Vawleicung University ṭha bik le minthang bik lak i aa telmi @YALE UNIVERDITY nih DAVID STANLEY hi kumkhat ah scholarship $70,000 pek chih in an cohlan cang. David Stanley hi Thantlang peng Farrawn khuami Pu Than Tling le Pi Grace Lalzui Lian Falam peng Lung Hawh khuami i an fapa a si. Amah hi Chinmi chung in Yale University ah a hmasa bik scholarship he sianginn a kai khomi a si lai.

TCP: A hmasabik ah tonnak caantha na kan pekmi cungah kan  i lawm tuk.

NTM: Kei zong tonnak ding le biahalnak nan ka ngeihmi cungah kaa lawm tuk ve.

TCP:A hramthawk ah nangmah konglam le na chungkhar kong na kan chim kho hnga maw?
NTM: Kei ka min cu  David Stanley Ngun Thang Mang ka si. Ka pa cu Pu Thang Tling,  Thantlang peng  le ka nu cu Lalzul Lian Falam peng a si. Unau pahnih kan si i kei hi upa bik ka si. US ram hi 2009 ah khan kan chungkhar tlingin kan phan.

TCP : Atu bantuk na phak khawhnak dingah na hngakchiat tein sianginn na rakkai ning pawl na kan chim kho hnga maw?

NTM : Ka nule ka pa nih hin fimthiamnak lei ah hin thazaang an rak ka pek i Grade 3 ka kai in mirang sianginn ah an rak ka kaiter cang. Zaan khuadei ca hna ka zoh, cun ka zawt bu tiangin sianginn ka kaimi hi a si.

TCP:Atu bantuk in scholarship ngahnak dingah award dang na ngahmi pawl a um maw?

NTM: Grade 3 ah ES ka ngah, sum of the year ti pawl ka ngah. Cun, Grade 4 cu kan umnak kan i thial caah ka ngah lo. Grade 5 ah sum of the year ka ngah than. Cun Grade 6 -8 tiang ah every Subiect pakhatnak laksawng ka ngah than i Grade 8 ah khan cun kum thum chungah a thiam bik an thim than i pakhatnak ka ngah than. Grade 9-11 tiang cu award a um ti lo i Grade 12nak ah a um than i mah ah cun award phun 15 hrawng ka ngah than i mah ah a sang bikmi Gifted ka ngah rih mi hi a si.

TCP: Atu Scholarship na ngahmi hi zeitluk Level dah a si i phungphai zulh awk hna tah a um maw?

NTM: Atu Scholarship ka ngahmi hi YALE University in pekmi a si. Nu le pa pakhat veve in an pekmi a si i mah ah cun pa in keimah nih ka ngah. US um Harvard University he aa zuamcawh ngai mi an si. Atu ka ngahmi hi  $77000 an ka pek mi a si. Mah chungah hin inn man, ei man, health care, Sianginn uniform man le sianginn man a dih lakin an ka liampiak dih lai. Kei cu ca lawng hi ka zoh ding le ka tuah dingmi a si. Phungphai an suaimi cu a um lo. An ka pek cangmi cu chuh than khawh a si ti lo i an lak than lo ding zong ah kaa zuam lai.

TCP: Atu na kai hnga dingmi tah?

NTM: Media/Film lei cawn kaa tim. Hihi ka huammi a si.

TCP: Sianghngakchia pakhat a simi nih a har bik tiah na ruah mi?

NTM: Sianghngakchia pakhat si lio ah a har bikmi cu Time management tuah khi a si ka ti.

TCP: Atu lio US President he i tong u law Laimi caah zeidah na hal lai?

NTM: Laimi caah rian hi a har tuk caah rian lei in opportunity kan ngahnak ding le ramchung ramleng fimcawnnak a san chinnak dingah ka chim lai.

TCP: Atu lio ah NLD cozah an riantuanmi ah na hmuh ning?

NTM: An riantuan ka hmuh khawh tawk ah ka lungtling ngai. Laimi chungin Vuanci le Vice President tiang kan tuan khawh hi Pathian thluachuah a si ka ti.

TCP: Atu lio ram thumnak a ummi hi hmailei kum 100 ah nan tlau te lai tiah na ruat maw?

NTM: Atu lio kan dirhmun in cun Laimi hi kan community le biaknak ah kan cawlcang ngai hna i zarhkhat voikhat tluk cu kan i tong ko hna caah kan tlau lai ti cu ka zum lo.

TCP: US um Lai mino nan dirhmun na hmuh ning?

NTM: Atu lio kan mino ka hmuh ningah cun tamhmawinak lei ah kan kal tuk. Cun Laimi umnak ah Biaknak ah cawlcangh a tam ngai caah mino tampi cu kan caan a liam ngai. Biaknak ah  pumpek cu a tha tuk ko nain fimcawnnak lei ah thazaang an chuah kho ti lo, cun ca zong an tei kho tuk lo tiah ka ruah.

TCP: Atu sianginn na dih in na miphun caah zeidah tuah na duh bik?

NTM: Kei hi miphun caah tuan ka duh, cun vawlei pi ca tiangin ka duh. Kan miphun le kan ram in riantuan hram ka thawk lai. Kan thiamnak hmang cio in nikhatkhat ah kan ram ah dir in kan tuan ti hna lai. Cun atu ka ngahmi hi mah nakin Lai mino tam chinchin nih an ngah chin lai tiah ka ruah.

TCP: Atu lio Laitlang na phak caah Laitlang lei Kan nuncan sining (living standard) na hmuh ning?

NTM: Kan nule pa cu hlanchan a nun ningin an kal cang. Lenglei in kan nun ning hi chunglei kan nunning a langhter tiah ka ruah. Mah caah kan hruk-aih tiangin kan i ralrin a herh. Cun hmailei ah kan si duhmi kha atu tein kan i timhlamh a herh.

TCP: Mipi sin ah biacah na duh mi?

NTM: Fa le caah fimthiamnak hi thazaang pe uh. Cun tangka lei ah harsa ngai in thazaang pe ko hna u. Atu cu a har ngai ko lai nain hmailei ah a fawi te ko lai. Pathian bochan bu in fimnak cawng u si law kan miphun le ram caah tuan i zuam hna u si.

TCP: Na caan sunglawi na kan pekmi cungah kan i lawm tuk.

NTM: Kei zong kaa lawm tuk ve.

Biaruahtu: Salai Tial Cung Thang (The Chinland Post)

Leave a Commnet

%d bloggers like this: