Zarhkhat Chung Ah Khua 3 le Sakhaan 11 SAC Nih An Sung
The Chinland Post | 2024 May 29 — Khua 3 le sakhaan 11 cu May 18 in May 24 tiang, zarhkhat chung ah SAC nih a sung, cun cuka hmunhma pawl ah tlangcung hriamtlai phu le dothlennak phu pawl nih an lak tiah Burma Affairs & Conflict Study (BACS) nih May 28 ah a thanh.
Tlangcung hriamtlai phu le dothlennak phu pawl nih zarhkhat chung ah an tlaih khawh mi khua hna cu Chin ramkulh Tozang le Cikha khua, Rakhine ram Buthidaung khua hna an si.
SAC ralkap sakhaan a tam bik an sunghnak hi Rakhine ram a si i a pahnihnak a tam bik hi Kachin ram sakhaan pawl an si.
Atu langhter mi pawl hi Operation 1027 hnu ah khua lak, sakhaan lak kahdohnak pawl a tam chin hi a si i Rakhine, Kachin le Chin hna ah an thazang a ṭhawng chin tiah BACS nih a thanh.
Zarhkhat chung ah kahdohnak voi zakhat leng SAC ralkap pawl nih Kachin, Rakhine, Chin le adang hmunhma 5 ah van lei kahdohnak a tuah tiah an thanh fawn.
Kaphnih lei kahdohnak a fah bantuk in mipi thahnak zong a karh ve i zarhkhat chung ah hngakchia 4 telh in mipi 46 an thi tiah BACS nih a thanh.
About The Author
