ZCD Party Nih Tedim Pengkomh Zung Pek Ding In Suu Kyi Sin Ah An Hal

Tawk Tling Thang | 2019 January 24| Zomi Congress for Democracy (ZCD) party nih Tonzang le Tedim peng pahnih cu Tedim pengkomh (district) zung pek ding in rampi ruahnak petu Daw Aung San Suu Kyi Tedim a tlawn lio January 21 ah catlap pek in an hal tiah theih a si.

Cuti catlap an pekmi chung ahcun; Tedim le Tonzang peng hi Chin ramkulh milu cheuli ah cheukhat tluk kan si pin ah Falam pengkomh zung he kum 60 chung kemhchih kan si. Mizapi le cozah zung i pehtlaihnak caah khan 160 renglo aa hlatmi  pengkomh i na va tlunkal a si caah harnak tampi  kan tong tiah an langhter chih.

Tedim le Tonzang peng hi Tedim pengkomh pek ding in Tedim peng Pyithu hluttaw palai  Pu Khan Khant Thang, Tonzang peng Pyithu hluttaw palai hna nih rampi ruahnak petu Daw Aung San Suu Kyi inn ah 2016  kum December zarhkhatnak ah an rak hal bal cang tiah theih a si.

Rampi ruahnak petu Daw Aung San Suu Kyi nih Tedim le Tonzang peng pahnih thazaang fonh in Tedim pengkomh peknak ding na kan bawmh  khawh lai timi mizapi nih an i ruahchan tiah catlap an pekmi ahcun an langhter chih.

ZCD le NLD party hi pehtlaihnak tha a ngeimi hawikom party an si tiah kan theih.

Chin ramkulh ah pengkomh (district) pali a um; cucu; Hakha pengkomh (Hakha, Thantlang), Mindat pengkomh (Mindat, Kanpetlet), Matupi pengkomh (Matupi, Paletwa), Falam pengkomh ah (Falam, Tedim  le Tonzang) an si.  Falam  pengkomh chung ahhin peng pathum le pengthen (Myo) pali  a um.

Chin ramkulh ah peng (township) pakua a um i pengthen timi myo (town) hi 8 a um. Cu hna cu; Rihkhawdar, Weibulah, Khaikam, Cikha, Hnaring, Rezua, Sami le Makui-inno an si. Arauh hlan ah Hakha peng, Surkhua zong Myo an pek lai tiah kan theih.

Na ruahning rak langhter ve.. (Leave a comment)

%d bloggers like this: