Chinland Cozah Hruainak In University Dirhnak Kong An Ceih
The Chinland Post | 2024 May 28 — Chinland cozah, Ministry of Education hruainak in siahngakchia pawl catang sang an kai khawh nakhnga The Chin National University Charter-Zero Draft an ṭial tiah theih a si.
May 23 le May 24 hna ah Lautu hmunhma, Hnaring khua ah Chin ramkulh chung siahngakchia pawl nih catang sang an kai khawh nakhnga Chinland cozah, Ministry of Education hruainak in biaruahnak an ngei hna i subjects tling cawn khawh nak The Chin National University (CNU) Charter-Zero Draft cu an ṭial khawh tiah theih a si.
Chin National University hi a chia a ṭha thleidan khawh nak lei ṭhanchonak, Research lei ṭhanchonak, zalonnak, tlukruannak, daihnak hna kha man ngei tak in Learning Society tuah ding, a ṭhangcho cuahmah mi Technology lei le kokek ṭihnung thil sining hna kha ṭha tein tawlrel ding timi ruahchanak 3 hna in awn a si lai tiah theih a si.
Chinland cozah, Ministry of Education bawmhnak in zalong tein a dir mi University dirh ding, Limhang ṭha tein a ngei mi le zalong tein cacawn khawh nak (Learning Platform) ser ding, nunchung ca a ṭhahnem ding cacawnnak thapek ding le zatlang ṭhanchonak a bawm kho tu University si ding, High School ṭha tein a dih cang i hriam a tlai mi CDM siahngakchia hna caah University kai kho ding in tawlrel ding, Research rian pawl ṭhanchoter ding le Quality ṭha te a ngei mi cacawnnak ser ding in timhtuahnak an ngei tiah theih a si.
Chin National University cu fimnak, zalonnak, mipi cawmkennak le nuhrin covo tiah zulhphung hna ser in Chin Nationak University tlaihtleng cu “Ceunak le Dinnak” a si tiah theih a si.
Cu ton biaruahnak cu hmaitonh in le online fonh in an tuah i Dr Thein Lwin nih online in a telpi hna tiah theih a si.
About The Author
