Vawleicung Ramkip Thihlohnak Thawngpang Pasarih
The Chinland Post| 2019 May 6| Vawleicung ramkip thihlohnak thawngpang tawi pasarih kan in hrawmh hna. Cu hna cu; 1. Russia Vanlawng A Kangh Ruang Ah Minung 41 An Thihnak, 2. Ralkap Bufonh Kahdohnak In IS Ralhrang 50 Tluk An Thihnak, 3. Sri Lanka Ram Tlangrai Zawtnak Ruang Ah Mi 15 An Thihnak, 4. India Ram Fani Thlichia Ruang Ah Minung 33 An Thihnak, 5. Houthi Hriamtlai Phu Nih Phung An Buar Ruang Ah Minung 140 An Thihnak, 6. Afghanistan Chaklei Ramkulh Kahdohnak Ah Minung 26 An Thihnak le 7. Turkey Ralkap Nih Kurd Ralhrang 28 An Thah Hnanak kong a si.
Russia Vanlawng A Kangh Ruang Ah Minung 41 An Thi
TCP-Hakha| 2019 May 6|
Russia vanlawng Aeroflot cu Sunday ni zanlei ah Moscow in Sheremetyevo vanlawng tual ah ruahlopi in a tum lio ah a kangh ruang ah minung 41 an thi. A thimi lakah a tlawmbik in ngakchia pahnih an i tel.
Vanlawng cung ah khualtlawng minung 73 le vanlawng lei riantuantu 5 he an zapi minung 78 an i cit. Vanlawng seh thatlonak a ngeih ruang ah ruahlopi in a tum lio i atu bantuk in a kangh hi a si. Ref: RFA
Ralkap Bufonh Kahdohnak In IS Ralhrang 50 Tluk An Thi
TCP-Hakha | 2019 May 6|
Afghanistan ram nichuahnak lei ramkulh pakhat ah ralakp bufonh nih vanlawng cung in kahdohnak a tuah i IS ralhrang minung 50 tiang an thi.
Afghanistan nitlaknak lei Taliban ralhrang kut in cozah ralkap chungtel minung 7 an thi. “Ralkap bu fonh nih zan ah vanalawng in kan kah hna i IS ralhrang a thimi lakah ram dangmi zong an i tel. Cun, an ralbawi pakhat zong a thimi lakah aa tel tiah ramkulh khuabawi changtu Gul Mohammad Baidar nih VOA ah a chim. Nawlngeitu cozah nih cun hi kahdohnak ruang ah zatlang mi 8 an thi tiah an chim ve. Ref: RFA
Sri Lanka Ram Tlangrai Zawtnak Ruang Ah Mi 15 An Thi
TCP-Hakha| 2019 May 6|
Sri Lanka ram, 2019 kum thlali chung ah tolbo zawtnak tlangrai ruang ah a thimi 15 an si cang i zawtnak a ngeimi 15,000 renglo an si cang tiah May 3 ah an thanh.
April 30 tiang ah zawtnak a ngeimi 15,407 an si. Mizapi nih taklinh tuk, luakluak, pawfah, lungmih, zun thawh khawh lo in na um ahcun rianrang in i thlopbul colh ding thiamsang hna nih an forhfial hna.
2018 kum Sri Lanka ram ah tolbo tlangrai zawtnak ruang ah minung 50 an rak thi i 48,000 renglo zawtnak an rak i chawnh tiah theih a si. Ref: Xinhua News
India Ram Fani Thlichia Ruang Ah Minung 33 An Thi
TCP-Hakha| 2019 May 6|
India ram nichuah lei Odisha ramkulh ah Fani cyclone thlichia ruang ah minung 33 tiang an thi tiah tualchung media nih May 5 ah an thanh.
Hi thlichia nih Odisha ramkulh cu fak ngai in a den ruang ah inn tampi a rakw, minung tampi umnak ti le electric mei a rawk, thingkung le meitung pawl an pur tiah theih a si.
Hi Fani thlichia a hrangmi hi India ram a hrangmi thlichia lakah a fak bikmi thlichia pakhat a si tiah theih a si. Ref: Xinhua News
Houthi Hriamtlai Phu Nih Phung An Buar Ruang Ah Minung 140 An Thi
TCP-Hakha| 2019 May 6|
2018 December thla in nihin tiang Houthi hriamtlai phu nih kahngolnak hnatlakmi cu voi tampi an buar ruang ah Hodeidah ah zatlangmi 140 an thi tiah Yemen cozah ralkap nih May 1 an thanh.
Yemen cozah le Houthi hriamtlai karlak ah Hodeidah kahngolnak min an thutmi cu Houthi hriamtlai phu nih voi 3719 an buar tiah Yemen cozah ralkap chimnak nawlngeitu Abdu Majali nih May 1, Marib ramkulh thawngfianternak ah a chim.
Houthi hriamtlai phu nih cozah ralkap ukmi hmun kha an kahdoh lengmang hna caah Hodeidah zatlangmi 140 an thi i 811 hliamhma an tuar. Aa hliammi tamdeuh cu nu le ngakchia an si. Ref: Xinhua News
Afghanistan Chaklei Ramkulh Kahdohnak Ah Minung 26 An Thi
TCP-Hakha| 2019 May 6|
Afghanistan chaklei Baghlan ramkulh i palek sakhan pakhat cu May 5 ah kah a tong i palek phu chungtel 18 telh in minung 26 an thi, 55 hliamhma an tuar tiah Afghanistan cozah nih a thanh.
Hi kahdohnak ah palek 18, a kaptu minung 8 an thi i palek 35 le zatlang mi 20 hliamhma an tuar. Atu lio hi Afghanistan palek le Taliban hriamtlai karlakah buainak pehzulh in a chuak. April thla ah Taliban hriamtlai hna nih Afghanistan nitlak lei Badghis ramkulh i hmun pahnih an laak tiah theih a si. Ref: Xinhua News
Turkey Ralkap Nih Kurd Ralhrang 28 An Thah Hna
TCP-Hakha| 2019 May 6|
Turkey ralkap pathum a thimi ca lehrulhnak caah Kurd ralhrang cu Turkey ralkap nih May 4 ah an kah hna i minung 28 an thi tiah Runvennak ministry zung nih an thanh.
Turkey ram nichuah thlanglei Hakkari ramkulh, May 4 ah Kurd riantuantu party (PKK) nih hriamnam ngan in an kah ruang ah Turkey ralkap 3 an thi i pakhat hliamhma a pu. Cu ruang ahcun Turkey ralkap nih an lehrulh ve hna i atu bantuk in minung 26 an thah hna hi a si.
Turkey, America le European nih ralhrang phu ah an chiahmi PKK cu Turkey ram ah 1984 kum in buai hram an rak i awt cang. Ref: Xinhua News
About The Author
